Kapiteni i Kombëtares së Zvicrës, Granit Xhaka, po hetohet nga Prokuroria e Lucernit lidhur me një certifikatë të falsifikuar të vaksinimit kundër Covid-19. Sipas një eksperti të së drejtës penale, në rast të një dënimi, futbollisti mund të përballet më shumë me një gjobë me kusht sesa me burgim.
Prokuroria e Lucernit po zhvillon hetime ndaj futbollistit shqiptar me shtetësi zvicerane, Granit Xhaka, lidhur me dyshimet për përdorimin e një certifikate të falsifikuar të vaksinimit kundër Covid-19.
Xhaka e ka pranuar publikisht se gjatë pandemisë kishte siguruar një vërtetim vaksinimi. Futbollisti e ka cilësuar këtë veprim si gabim, ka kërkuar falje dhe ka deklaruar se është i gatshëm të bashkëpunojë plotësisht me autoritetet.
Por çfarë pasoja juridike mund të ketë ky rast?
Eksperti shpjegon kuadrin ligjor
Sven Zimmerlin, ligjërues i së drejtës penale dhe procedurës penale në Universitetin e Shkencave të Aplikuara të Cyrihut, ka shpjeguar për televizionin publik zviceran SRF se në këtë rast mund të bëhet dallimi ndërmjet disa veprave penale që lidhen me dokumentet e falsifikuara.
Sipas tij, falsifikimi klasik i dokumentit ndodh kur një person paraqitet si lëshues i një dokumenti që në fakt nuk është përpiluar prej tij.
Një tjetër mundësi është vërtetimi i rremë, ku dokumenti lëshohet nga personi apo institucioni që figuron në të, por informacioni që përmban nuk është i vërtetë.
Përcaktimi i mënyrës se si është siguruar dhe përdorur certifikata e vaksinimit do të jetë, për këtë arsye, i rëndësishëm për përcaktimin e natyrës juridike të rastit.
Sipas Zimmerlin, falsifikimi i dokumenteve konsiderohet vepër penale e rëndë në Zvicër dhe mund të dënohet me burgim deri në pesë vjet ose me gjobë.
Megjithatë, eksperti ka sqaruar se dënimi maksimal i parashikuar në ligj nuk nënkupton se personi i hetuar do të dënohet domosdoshmërisht me pesë vjet burg.
“Më shumë gjasa një gjobë me kusht”
Për të pasur një dënim penal, autoritetet duhet të vërtetojnë elementet përkatëse të veprës, përfshirë dijeninë dhe qëllimin e personit të dyshuar.
Në rastin e Xhakës, sipas ekspertit, rëndësi do të ketë edhe nëse ai ka pasur dënime të mëparshme dhe si do të vlerësohen rrethanat e çështjes.
Zimmerlin vlerëson se, nëse Xhaka trajtohet si shkelës për herë të parë, një dënim me burg nuk do të ishte skenari kryesor.
“Besoj se në fund çështja me gjasë do të përfundojë me një gjobë me kusht”, ka deklaruar Zimmerlin për SRF.
Ai ka theksuar se vlerësimi përfundimtar i përgjegjësisë penale i takon Prokurorisë ose gjykatës, pasi të shqyrtohen të gjitha faktet dhe provat e rastit.
Xhaka mungon në katër ndeshjet e ardhshme
Krahas procedurës penale në Zvicër, Xhaka nuk do të jetë pjesë e grumbullimit dhe katër ndeshjeve të ardhshme të Kombëtares së Zvicrës.
Vendimi është marrë në koordinim ndërmjet futbollistit dhe drejtuesve të Federatës Zvicerane të Futbollit, ndërsa statusi i tij do të rivlerësohet pas përfundimit të këtij cikli ndërkombëtar.
Procedura penale ndaj Xhakës është ende në zhvillim dhe deri më tani nuk ka një vendim gjykate përfundimtar. Për rrjedhojë, futbollisti gëzon prezumimin e pafajësisë deri në përfundimin e procedurës dhe marrjen e një vendimi përfundimtar nga autoritetet kompetente./BS
