Drejtori operativi FIFA-s, Kevin Lamour, është shkarkuar nga organi qeverisës i futbollit, më pak se tre javë pasi kritikoi ashpër presidentin e FIFA-s, Gianni Infantino, për planin e tij të braktisur për t’u shitur investitorëve privatë aksione në kompeticione.
Në një deklaratë, një zëdhënës i FIFA-s konfirmoi vetëm se “marrëdhënia e punës mes FIFA-s dhe Kevin Lamour, në cilësinë e drejtorit të operacioneve, ka përfunduar më 17 gusht 2026”.
“FIFA e falënderon Kevin për dy vitet e shërbimit dhe i uron atij suksese në të ardhmen”, thuhet në deklaratë.
Stafi i FIFA-s u informua për lajmin përmes një emaili të dërguar nga sekretari i përgjithshëm, Mattias Grafström, të hënën në mbrëmje. Ai u tha punonjësve se organizata dhe Lamour “kishin rënë dakord të ndanin rrugët”.
Muajin e kaluar, Lamour i përshkroi planet kontroverse të FIFA Forward Enterprise (FFE) si “projekti i një personi” dhe tha se “ka ardhur koha që drejtuesit politikë të futbollit t’i bëjnë vetes pyetjet e duhura dhe të marrin vendimet e duhura”.
Ai shtoi se vetë administrata e FIFA-s ishte “mashtruar” në lidhje me projektin, i cili tashmë është braktisur. “Misioni ynë, misioni i qindra punonjësve të FIFA-s, të apasionuar, të përkushtuar dhe shembullorë, është t’i shërbejmë futbollit. Një president duhet t’i bashkojë njerëzit, t’i unifikojë dhe t’i frymëzojë. Sot, po përjetojmë të kundërtën”, tha ai.
Lamour pranoi se kishte detyrimin e besnikërisë ndaj punëdhënësit të tij, por edhe ndaj “disa vlerave” dhe mbështetjes së kolegëve të tij.
“Nëse kjo do të thotë se humbas vendin e punës, atëherë kështu qoftë. Do ta kuptoj dhe do ta respektoj atë vendim. Të paktën, do të fle i qetë sonte”, shtoi ai.
Lamour iu bashkua FIFA-s në nëntor të vitit 2024, pasi më parë kishte shërbyer si zëvendëssekretar i përgjithshëm në UEFA. Ai ishte dy nivele drejtimi poshtë Infantinos.
Në fillim të këtij muaji, Infantino mori mbështetjen e drejtuesve të lartë në një takim në Marok, por BBC Sport mësoi se Lamour nuk ishte ftuar.
Në një letër drejtuar anëtarëve të Këshillit të FIFA-s, Grafström shkroi:
“Dëshiroj t’ju jap një përditësim të rëndësishëm lidhur me një ndryshim brenda administratës së FIFA-s.
Pas diskutimeve të fundit, FIFA dhe drejtori ynë i operacioneve, Kevin Lamour, kanë rënë dakord të ndajnë rrugët. Ky vendim u mor pas shqyrtimit të kujdesshëm dhe me respekt të madh për Kevinin, si personalisht, ashtu edhe profesionalisht. E ndjeva të rëndësishme që t’jua komunikoja personalisht këtë përditësim dhe dëshiroj të shpreh mirënjohjen time ndaj Kevinit për kontributin, punën dhe përkushtimin e tij të përditshëm në shërbim të FIFA-s. I uroj Kevinit gjithë të mirat për të ardhmen.”, transmeton euronewsal.
