Pas ditës së ngrohtë dhe me diell, moti në Zvicër ndryshon sot, të mërkurën. Në pjesën veriore të Alpeve priten vranësira të dendura, reshje lokale dhe rënie e temperaturave, ndërsa të enjten mjegulla e lartë do të rikthehet në Rrafshnaltën e Zvicrës, transmeton 20min.ch. Sipas parashikimit të shërbimit meteorologjik MeteoSwiss, temperaturat në ultësira do të arrijnë sot rreth 13 gradë Celsius, dukshëm më pak se të martën, kur në disa zona shënuan deri në 20 gradë. Reshjet pritet të jenë më të shpeshta përgjatë zonave paraalpine, ndërsa në rajonet e brendshme alpine moti do të jetë kryesisht i thatë, me intervale me diell. Kufiri i reshjeve të borës do të qëndrojë ndërmjet 2.100 dhe 2.500 metrave lartësi.
Të enjten rikthehet mjegulla e lartë
Të enjten, mjegulla e lartë do të mbulojë Rrafshnaltën e Zvicrës dhe zonat paraalpine. Shtresa e saj pritet të arrijë lartësinë prej 1.100 deri në 1.500 metrash, ndërsa shpërndarja gjatë pasdites do të jetë vetëm e pjesshme. Jashtë zonave të mbuluara nga mjegulla, moti do të jetë kryesisht me diell. Temperaturat në ultësira do të lëvizin nga 3 deri në 7 gradë në mëngjes dhe nga 8 deri në 13 gradë gjatë pasdites. Era Bise do të fryjë me intensitet mesatar, duke sjellë ndjesinë e një moti më të ftohtë.
Edhe e premtja me mjegull në ultësira
Të premten, mjegulla e lartë mund të vazhdojë në pjesën veriore të vendit, me shtresën e saj që pritet të arrijë nga 1.100 deri në 1.500 metra. Në zonat mbi mjegull, moti do të jetë kryesisht me diell. Temperaturat maksimale në ultësira pritet të arrijnë nga 8 deri në 12 gradë Celsius. Pas disa ditësh me temperatura të buta, Zvicra po përballet me një mot më tipik vjeshtor, me më shumë vranësira, reshje lokale dhe mëngjese të ftohta. Ndërsa në ultësira do të mbizotërojë mjegulla, zonat malore mund të ofrojnë më shumë diell gjatë pjesës së dytë të javës, transmton 20min.ch, përcjell helveticALforum.ch.
