BASEL – Derbi zviceran mes Baselit të Xherdan Shaqirit dhe Grasshoppersit të Amir Abrashit ka përfunduar pa fitues. Dy skuadrat barazuan 0:0 në stadiumin “St. Jakob-Park”, në kuadër të javës së 11-të të kampionatit zviceran të futbollit, në një ndeshje ku vendasit patën disa mundësi të mira për të shënuar, por nuk arritën t’i konkretizonin. Kapiteni i Baselit, Xherdan Shaqiri, e zhvilloi të gjithë ndeshjen, duke qenë një nga lojtarët më të angazhuar në përpjekjet e vendasve për të gjetur golin. Në anën tjetër, Amir Abrashi, Bujar Pllana dhe Samuel Krasniqi u paraqitën gjatë gjithë takimit për Grasshoppersin, që arriti të largohej nga Baseli me një pikë të vlefshme.
Shaqiri pranë golit që në minutat e para
Baseli e nisi ndeshjen në kërkim të golit dhe rastin e parë serioz e krijoi që në minutën e tretë. Pas një gabimi të mbrojtjes së Grasshoppersit, vendasit rifituan shpejt topin dhe nisën aksionin sulmues. Shaqiri mori përgjegjësinë për organizimin e aksionit, duke pasuar drejt Omeragiqit. Ky i fundit goditi portën, por topi u përplas në traversë, duke i shpëtuar mysafirët nga pësimi i golit që në fillim të takimit. Vendasit vazhduan të kërkonin hapësira në mbrojtjen kundërshtare, ndërsa Grasshoppersi u përpoq të ruante ekuilibrin dhe të mos lejonte që Baseli ta kthente presionin në avantazh.
Baseli kërkon golin, por mbrojtja e mysafirëve reziston
Në pjesën e dytë, Shaqiri vazhdoi të ishte një nga pikat kryesore të lojës sulmuese të Baselit. Në minutën e 62-të, ai realizoi një aksion të mirë individual dhe arriti ta shërbente Zelarin në një pozitë të favorshme për të rrezikuar portën. Megjithatë, vendasit nuk arritën ta shfrytëzonin mundësinë dhe rezultati mbeti i pandryshuar. Tetë minuta më vonë, në minutën e 70-të, Baseli krijoi një tjetër rast të rrezikshëm. Pas një aksioni ku ishte i përfshirë edhe Shaqiri, Otele goditi drejt portës, por mbrojtja e Grasshoppersit ndërhyri në momentin e fundit dhe bllokoi gjuajtjen. Deri në përfundim të takimit, Baseli vazhdoi të kërkonte golin e fitores, por mbrojtja mysafire qëndroi e organizuar, duke mos lejuar që vendasit të gjenin rrugën drejt rrjetës.
Baseli mbetet në vendin e shtatë, Grasshoppersi merr një pikë
Barazimi pa gola nuk i ndryshon ndjeshëm pozitat e dy skuadrave në tabelën e kampionatit zviceran. Baseli, me këtë rezultat, renditet në vendin e shtatë me 14 pikë, ndërsa Grasshoppersi pozicionohet në vendin e 11-të me nëntë pikë. Për Baselin, ky ishte një takim në të cilin rastet e krijuara nuk u shndërruan në gola, ndërsa Grasshoppersi mund të jetë i kënaqur me pikën e fituar në transfertë. Derbi mes dy skuadrave, që kishte edhe përballjen interesante mes reprezentuesve shqiptarë Xherdan Shaqiri dhe Amir Abrashi, përfundoi pa fitues, duke lënë të hapur garën për pikët e radhës në kampionat./K.Goca/BS
