Qeveria e Kosovës ka zhvilluar një mbledhje elektronike, në të cilën ka miratuar vendimin lidhur me nismën legjislative për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Sipas njoftimit të Qeverisë, vendimi është marrë në përgjigje të kërkesës së Kuvendit të Republikës së Kosovës, të datës 23 shtator 2026.
Në njoftim thuhet se Qeveria ka miratuar vendimin për t’iu përgjigjur kërkesës së Kuvendit me numër protokolli 1108, lidhur me nismën legjislative për Projektligjin Nr. 11/L-001 për ndryshimin dhe plotësimin e Ligjit Nr. 05/L-053 për Dhomat e Specializuara dhe Zyrën e Prokurorit të Specializuar.
Vlerësimi i kërkuar nga Kuvendi përfshin disa komponentë ligjorë dhe financiarë. Sipas Qeverisë, ai përfshin opinionin ligjor për përputhshmërinë me acquis të Bashkimit Evropian, vlerësimin e ndikimit buxhetor, si dhe opinionin ligjor lidhur me përmbajtjen e projektligjit.
Me këtë vendim, procesi institucional për shqyrtimin e nismës legjislative hyn në një fazë të mëtejshme, ndërsa dokumentet dhe vlerësimet përkatëse pritet të shërbejnë si bazë për procedurat e mëtejshme në Kuvend.
Çështja lidhet me kuadrin ligjor që rregullon funksionimin e Dhomave të Specializuara të Kosovës dhe Zyrës së Prokurorit të Specializuar, institucione me seli në Hagë që trajtojnë rastet e përcaktuara në mandatin e tyre, transmeton rtk.
