Deputetë të Partisë Demokratike të Kosovës (PDK) dhe Aleancës janë paraqitur sot në sallën e Kuvendit të Kosovës, një ditë pasi është kërkuar vazhdimi i seancës për konstituimin e legjislativit.
Megjithëse për ditën e sotme nuk ishte thirrur seancë e Kuvendit, deputetët e këtyre dy subjekteve politike janë mbledhur në ambientet e Kuvendit rreth orës 11:00.
Prania e tyre në sallën plenare u shoqërua me një aksion simbolik nga deputetët e PDK-së. Ata vendosën para ulëseve të deputetëve të Lëvizjes Vetëvendosje letra me mesazhin: “Respektoni Kushtetutën, konstituojeni Kuvendin”.
Me këtë veprim, PDK-ja ka shprehur kundërshtimin ndaj zvarritjes së procesit të konstituimit të Kuvendit dhe ka kërkuar që procedurat parlamentare të vazhdojnë në përputhje me Kushtetutën.
Kërkesa për vazhdimin e seancës vjen në një kohë kur procesi i konstituimit të Kuvendit mbetet një nga çështjet kryesore politike në vend. Përfaqësuesit e opozitës kanë bërë thirrje që institucionet e reja të konstituohen sa më shpejt, duke e konsideruar funksionalizimin e Kuvendit si hap të domosdoshëm për vazhdimin e punës institucionale.
Ndërkohë, mbetet e paqartë se kur do të thirret seanca e radhës dhe nëse palët politike do të arrijnë një marrëveshje për të zhbllokuar procesin e konstituimit.
Tensionet politike rreth formimit dhe funksionalizimit të institucioneve vazhdojnë të mbajnë në fokus Kuvendin e Kosovës, ndërsa partitë politike pritet të intensifikojnë përpjekjet për gjetjen e një zgjidhjeje, transmeton rtk.
