Nga sot deri të premten, në Dhomat e Specializuara të Kosovës në Hagë do të zhvillohen seanca gjyqësore në rastin ndaj ish-presidentit të Kosovës, Hashim Thaçi dhe të tjerëve, të cilët akuzohen për pengim të administrimit të drejtësisë. Seanca e parë është caktuar për të hënën, më 11 maj, duke filluar nga ora 09:30.
Ky proces lidhet me aktakuzën e ngritur ndaj Thaçit dhe bashkëpunëtorëve të tij, ku pretendohet se ata kanë vepruar individualisht dhe në koordinim me njëri-tjetrin për të ndikuar ose penguar zyrtarët në ushtrimin e detyrave të tyre zyrtare.
Në kuadër të këtij rasti, më 5 dhjetor 2024 në Kosovë u arrestuan Bashkim Smakaj, Fadil Fazliu dhe Isni Kilaj. Një ditë më pas, ata u transferuan në qendrën e paraburgimit në Hagë, pas konfirmimit të aktakuzës dhe urdhërarresteve nga Gjykata Speciale.
Po atë ditë, edhe Hashim Thaçi, i cili tashmë ndodhej në paraburgim për një proces tjetër gjyqësor, mori zyrtarisht fletarrestimin lidhur me këtë rast të ri.
Ndërkohë, Hajredin Kuçi u njoftua me aktakuzën dhe urdhrin për paraqitje para gjykatëses së procedurës paraprake më 9 dhjetor.
Të gjithë të akuzuarit, gjatë paraqitjes së parë para gjykatës më 27 shkurt 2026, janë deklaruar të pafajshëm ndaj akuzave që rëndojnë mbi ta.
Seancat e kësaj jave pritet të fokusohen në procedurat paraprake dhe paraqitjen e argumenteve nga palët në proces, një rast që po ndiqet me vëmendje të madhe si në Kosovë ashtu edhe në arenën ndërkombëtare, transmeton rtk.
