Lionel Messi, vazhdon të shkëlqejë në MLS ku shënoi dy gola në fitoren 3-2 të Inter Miami ndaj DC United, duke qenë përsëri protagonisti kryesor i skuadrës së tij.
Ndeshja nisi mirë për Interin, që kaloi në epërsi në minutën e 35-të me golin e Allende. Megjithatë, Benteke barazoi në minutën e 53-të për DC United, duke e kthyer gjithçka në pikën zero. Pikërisht atëherë në skenë hyri Messi.
Në minutën e 66-të, argjentinasi shënoi për 2-1, duke i dhënë epërsi skuadrës së tij.
Pak më pas, ai ia dorëzoi penalltinë bashkëkombësit të tij 19-vjeçar, Silvetti, i cili goditi traversën dhe humbi mundësinë për të vulosur rezultatin.
Messi nuk u ndal me kaq. Në minutën e 85-të gjeniu argjentinas shënoi gol spektakolar përsëri për 3-1, duke siguruar praktikisht fitoren e Interit. Në minutat shtesë, Murrell shënoi për 3-2, por nuk mjaftoi për t’ia mohuar tri pikët skuadrës nga Florida.
Me këta dy gola, Messi arriti kuotën e 22 realizimeve këtë sezon në MLS. Kjo ishte hera e gjashtë që ai e mbyll një ndeshje me dy gola në emrin e tij, pasi e kishte bërë më parë kundër Montrealit, New England, Nashville, New York Red Bulls dhe Orlandos, transmeton telegrafi.
