Nga Dashnim HEBIBI
Arsim Mulliqaj: Shqipërisë i duhen drejtues me duar të pastra – “Të jemi të bashkuar si komb”
MILANO, 20 shtator 2026– Zëri i protestave nga Tirana është përcjellë edhe në zemër të Milanos, ku mërgata shqiptare është mbledhur sërish për të shprehur mbështetjen e saj ndaj protestave që po zhvillohen në Shqipëri. Me pankarta, flamuj dhe thirrje politike, protestuesit kanë përcjellë mesazhin e tyre në qendër të qytetit italian, duke e kthyer Milano-n në një tjetër pikë të mobilizimit të shqiptarëve jashtë Shqipërisë. Protesta e mërgatës në Milano është zhvilluar në kuadër të mobilizimit të vazhdueshëm të komunitetit shqiptar në Itali. Për 20 shtator ishte paralajmëruar një marshim nga Piazza Cordusio drejt Largo Cairoli, ku do të zhvillohej edhe tubimi dhe fjalimet. Sipas organizatorëve, në aktivitet pritej pjesëmarrje e gjerë e shqiptarëve nga Lombardia, Italia e Veriut dhe zona të ndryshme të Zvicrës, ndërsa ishte paralajmëruar edhe pjesëmarrja e eurodeputetëve. Në këtë atmosferë proteste dhe mobilizimi qytetar, një fjalë rasti para protestuesve e mbajti edhe Arsim Mulliqaj, veprimtar, poet dhe publicist shqiptar me prejardhje nga Podujeva e Kosovës, i cili jeton dhe vepron prej vitesh në Itali. Fjalimi i tij u prit me duartrokitje dhe me thirrje të shumta nga turma, ndërsa ndër sloganet që u dëgjuan ishte edhe “UÇK! UÇK!”. Mulliqaj foli për zhvillimet politike në Shqipëri, por mesazhi i tij u shtri edhe në një dimension më të gjerë kombëtar, duke kërkuar bashkim dhe përgjegjësi në përfaqësimin politik të shqiptarëve.
“Shqipërisë i duhen drejtues me duar të pastra”
Në fjalën e tij, Mulliqaj theksoi se Shqipëria ka nevojë për një qasje të re politike dhe për drejtues që, sipas tij, duhet të kenë integritet dhe përgjegjësi publike.
“Shqipërisë i duhen drejtues me duar të pastra për një të ardhme më të mirë”, ishte një nga mesazhet kryesore të tij para protestuesve. Ai u bëri thirrje shqiptarëve që të ruajnë unitetin dhe të mos lejojnë që dallimet politike të shndërrohen në përçarje kombëtare.
“Të jemi të bashkuar si komb dhe të ecim me suksese me personalitete të suksesshëm”, deklaroi Mulliqaj.
Duke iu drejtuar protestuesve, ai shtoi se do të vazhdojë t’i mbështesë ata në qëndrimet e tyre.
“Vazhdoj t’ju mbështes sepse keni të drejtë”, tha ai, duke marrë duartrokitje nga të pranishmit.
“Rama i ka përzier punët në thuajse çdo trevë shqiptare”
Mulliqaj ishte i drejtpërdrejtë edhe në qëndrimin e tij ndaj kryeministrit shqiptar Edi Rama.
“Rama i ka përzier punët thuajse në çdo trevë shqiptare dhe duhet të largohet sa më shpejt”, u shpreh ai para protestuesve.
Kjo deklaratë u prit me reagim të fortë nga turma, në një protestë ku pankartat dhe thirrjet kundër qeverisë shqiptare ishin të pranishme gjatë gjithë aktivitetit. Në fjalën e tij, Mulliqaj solli gjithashtu në vëmendje Ushtrinë Çlirimtare të Kosovës. Në një moment kur nga turma u dëgjuan thirrjet “UÇK! UÇK!”, ai iu referua luftës çlirimtare dhe tha se edhe bota demokratike e di se UÇK-ja ishte ushtri çlirimtare. Mesazhi i tij, megjithatë, nuk u kufizua vetëm te politika e ditës. Ai kërkoi që shqiptarët, pavarësisht se ku jetojnë dhe cilat janë bindjet e tyre politike, të ruajnë një frymë bashkimi dhe të punojnë për një të ardhme më të mirë.
Mërgata kërkon të dëgjohet
Mobilizimi në Milano vjen pas një periudhe protestash të vazhdueshme në Tiranë dhe pas disa tubimeve të komunitetit shqiptar në Itali. Sipas raportimeve lokale italiane, protesta e radhës në Milano është pjesë e një mobilizimi që është shtrirë prej javësh edhe jashtë Shqipërisë. Aktivistja Suela Mehdini, kishte paralajmëruar se marshimi në Milano do të zgjaste rreth një orë dhe do të përfundonte në Piazza Cairoli, ku do të zhvilloheshin fjalime dhe do të kishte pjesëmarrje edhe të të rinjve. Ajo theksoi gjithashtu se mërgata shqiptare në Itali kishte qenë aktive edhe gjatë muajit gusht. Sipas Mehdinit, një nga shqetësimet kryesore të diasporës është mënyra se si ajo është trajtuar ndër vite nga politika shqiptare. Ajo argumentoi se mërgata është përdorur kryesisht për interesa partiake dhe për votën e saj. Kështu, protesta e Milanos nuk po përcjell vetëm një mesazh politik të drejtuar ndaj qeverisë shqiptare. Ajo po nxjerr në pah edhe një kërkesë më të gjerë të mërgatës: që zëri i shqiptarëve që jetojnë jashtë vendit të mos dëgjohet vetëm në periudha zgjedhore, por të konsiderohet pjesë e debatit publik dhe e zhvillimeve që prekin Shqipërinë.
Nga Tirana në Milano
Për mërgatën shqiptare, Milano është shndërruar tashmë në një prej pikave ku protestat nga Shqipëria po marrin jehonë ndërkombëtare. Organizatorët u janë drejtuar shqiptarëve në Lombardi, në qytete të tjera të Italisë së Veriut, por edhe atyre që jetojnë në Zvicër, duke kërkuar pjesëmarrje sa më të gjerë. Në mesin e pankartave dhe thirrjeve politike, mesazhet e protestuesve janë ndërthurur edhe me simbole dhe tema që lidhen me identitetin kombëtar shqiptar. Në këtë kontekst, fjala e Arsim Mulliqajt mori një dimension të veçantë. Ai kërkoi jo vetëm ndryshime politike, por edhe bashkim shqiptar, duke e përmbledhur mesazhin e tij me thirrjen për një të ardhme të ndërtuar mbi përgjegjësinë, integritetin dhe bashkëpunimin. Nga qendra e Milanos, mes duartrokitjeve dhe thirrjeve “UÇK! UÇK!”, mesazhi i tij ishte i qartë: shqiptarët duhet të jenë të bashkuar dhe të kërkojnë një të ardhme më të mirë, ndërsa drejtuesit politikë duhet të mbajnë përgjegjësi për veprimet e tyre. Protesta, sipas organizatorëve dhe pjesëmarrësve, nuk pritet të mbyllet me këtë aktivitet. Mobilizimi i mërgatës shqiptare në Itali do të vijojë edhe në ditët në vazhdim.
