Ministria e Kulturës, Rinisë dhe Sportit e ka cilësuar pjesëmarrjen e Kosovës në Panairin e Librit në Leipzig 2025 si një moment të rëndësishëm për promovimin e letërsisë kosovare në skenën ndërkombëtare.
Përmes Bibliotekës Kombëtare të Kosovës, vendi ynë mori pjesë në këtë ngjarje prestigjioze, duke organizuar aktivitete letrare që përfshinë diskutime mbi letërsinë shqipe dhe sfidat e përkthimit, si dhe rolin e letërsisë në ruajtjen e kujtesës kolektive.
“Qerim Ondozi dhe Feride Berisha diskutuan mbi letërsinë shqipe dhe sfidat e përkthimit, ndërsa Ag Apolloni prezantoi librin e tij Red Riding Hood: Fairy Tale for Grown-Ups, duke trajtuar rolin e letërsisë në ruajtjen e kujtesës kolektive”.
“Një tjetër diskutim, i organizuar nga TRADUKI dhe Biblioteka Kombëtare, bëri bashkë Blerina Rogova Gaxhën dhe Jehona Kicajn për të debatuar mbi letërsinë kosovare në sfondin e migrimit dhe traumës së luftës”, thuhet në njoftimin e MKRS-së.
Pjesëmarrja në këtë panair solli interes të madh nga lexuesit dhe botuesit gjermanë, duke hapur mundësi të reja për bashkëpunime kulturore ndërkombëtare.
