Prishtinë, 24 gusht 2026 – Ministria e Mbrojtjes ka hapur konkursin për nominimin e kandidatëve nga Kosova që do të kenë mundësinë të ndjekin studimet në Akademinë Ushtarake të Shteteve të Bashkuara të Amerikës (West Point). Sipas njoftimit të Ministrisë së Mbrojtjes, konkursi u drejtohet të rinjve kosovarë që synojnë të ndërtojnë një karrierë në fushën ushtarake dhe të marrin arsimim në një prej institucioneve më prestigjioze ushtarake në botë. Të drejtë aplikimi kanë shtetasit e Republikës së Kosovës, të cilët kanë përfunduar shkollën e mesme, janë të moshës 18 deri në 22 vjeç dhe përmbushin kriteret e përcaktuara shëndetësore, fizike dhe ligjore. Ministria e Mbrojtjes e ka cilësuar këtë mundësi si një hap të rëndësishëm për të rinjtë që dëshirojnë të zhvillojnë aftësitë e tyre profesionale dhe të përgatiten për një karrierë në shërbim të vendit.
“Kjo është mundësia për të ndërtuar një karrierë ushtarake në një nga akademitë më prestigjioze ushtarake në Shtetet e Bashkuara të Amerikës”, thuhet në njoftimin e Ministrisë.
Afati për aplikim është i hapur nga 24 gusht deri më 7 shtator 2026. Ministria e Mbrojtjes u ka bërë thirrje të gjithë të rinjve që i plotësojnë kriteret të shfrytëzojnë këtë mundësi dhe të aplikojnë brenda afatit të përcaktuar. Studimet në Akademinë Ushtarake të SHBA-së përfaqësojnë një mundësi të rëndësishme për përgatitjen akademike, profesionale dhe ushtarake të kuadrove të rinj nga Kosova, si dhe për forcimin e mëtejshëm të bashkëpunimit ndërmjet Kosovës dhe Shteteve të Bashkuara në fushën e mbrojtjes dhe sigurisë, transmeton rtk.
