Ambasadori i Kosovës, Delfin Pllana, është takuar me drejtorin e ri të Departamentit për Evropën Juglindore në Ministrinë e Punëve të Jashtme të Hungarisë, Viktor Matis. Në takim janë diskutuar marrëdhëniet dypalëshe, agjenda e bashkëpunimit ndërmjet dy vendeve dhe çështja e vizave të punës për qytetarët e Kosovës.
Ambasadori i Republikës së Kosovës, Delfin Pllana, i shoqëruar nga Sekretarja e Dytë, Dafina Bakija, ka zhvilluar një takim me Ambasadorin Viktor Matis, Drejtor i ri i Departamentit për Evropën Juglindore në Ministrinë e Punëve të Jashtme të Hungarisë, si dhe me bashkëpunëtorët e tij.
Gjatë takimit, Ambasadori Pllana e ka uruar Matis për marrjen e detyrës së re dhe ka shprehur interesimin e Kosovës për forcimin dhe thellimin e mëtejshëm të marrëdhënieve dhe bashkëpunimit ndërmjet dy vendeve.
Në fokus të bisedës kanë qenë zhvillimet aktuale dhe aktivitetet e planifikuara në kuadër të bashkëpunimit dypalësh Kosovë-Hungari.
Palët kanë diskutuar gjithashtu për çështje me interes të përbashkët, ndërsa një nga temat e ngritura gjatë takimit ka qenë edhe çështja e vizave të punës për shtetasit e Republikës së Kosovës.
Hungaria shpreh gatishmëri për bashkëpunim
Ambasadori Viktor Matis e ka falënderuar homologun kosovar për vizitën dhe ka konfirmuar gatishmërinë e tij për të kontribuar në lehtësimin dhe avancimin e mëtejshëm të aktiviteteve dhe bashkëpunimit ndërmjet Kosovës dhe Hungarisë.
Takimi është zhvilluar në kuadër të përpjekjeve për forcimin e kontakteve institucionale dhe diplomatike ndërmjet dy vendeve, ndërsa çështjet e bashkëpunimit dypalësh dhe të vizave të punës mbeten pjesë e agjendës së diskutimeve.
Të dyja palët kanë shprehur interes për vazhdimin e komunikimit dhe avancimin e aktiviteteve të përbashkëta në periudhën e ardhshme, transmeton Ambasada e Republikës së Kosovës në Hungari, përcjell helveticALforum.ch.
