Përgatiti Dashnim HEBIBI
Berlin, 22 shtator 2026 – Kompania e njohur nga Shkupi, EKA d.o.o., pjesë e grupit global Knorr-Bremse, po prezanton potencialin dhe inovacionet e saj në edicionin jubilar të InnoTrans 2026, panairi më i madh ndërkombëtar i teknologjisë së transportit, i cili po zhvillohet nga 22 deri më 25 shtator në ambientet e Messe Berlin.
Në këtë ngjarje të rëndësishme ndërkombëtare, ku janë mbledhur kompani, ekspertë dhe liderë të industrisë së transportit, hekurudhave dhe teknologjisë së lëvizshmërisë, pjesëmarrja e kompanisë nga Shkupi përbën një tjetër dëshmi të kapaciteteve profesionale dhe teknologjike që vijnë nga Maqedonia e Veriut.
Ambasadori Sela viziton EKA-n në InnoTrans
Stenda e EKA d.o.o. në Berlin u vizitua nga Ambasadori i Republikës së Maqedonisë së Veriut në Gjermani, Prof. Dr. Ylber Sela, i cili u njoh nga afër me produktet, teknologjitë dhe inovacionet e kompanisë.
Gjatë vizitës, Ambasadori Sela vlerësoi pjesëmarrjen e EKA-s në këtë platformë prestigjioze ndërkombëtare dhe theksoi rëndësinë që kanë kompanitë e suksesshme nga Maqedonia e Veriut për promovimin e potencialit ekonomik dhe teknologjik të vendit në tregjet evropiane dhe globale.
Kompania në këtë panair përfaqësohet nga Boban Cvetkovski, nga departamenti i Marketing Management, i cili prezanton aktivitetet dhe zgjidhjet teknologjike të EKA-s para vizitorëve dhe partnerëve ndërkombëtarë.
Nga Shkupi drejt tregjeve globale
EKA d.o.o.e.l. Shkup është një kompani e specializuar në zhvillimin dhe prodhimin e pajisjeve testuese stacionare dhe të lëvizshme për sistemet e frenimit të mjeteve hekurudhore.
E themeluar në vitin 1976, EKA ka ndërtuar gjatë dekadave një profil të specializuar në sektorin hekurudhor. Në vitin 2014, shumicën e aksioneve të kompanisë e bleu gjiganti gjerman Knorr-Bremse GmbH, duke e integruar EKA-n në rrjetin dhe portofolin global të sistemeve për mjetet hekurudhore.
Sot, produktet e EKA-s përdoren nga operatorë hekurudhorë, punishte private dhe prodhues të mjeteve hekurudhore në tregje të ndryshme të Evropës, Azisë dhe Afrikës.
Prania e kompanisë në InnoTrans 2026 e vendos kështu Shkupin në hartën e një prej platformave më të rëndësishme botërore të industrisë së transportit hekurudhor.
Rasti i EKA-s është veçanërisht domethënës: një kompani me origjinë nga Shkupi, e cila gjatë dekadave ka arritur të integrohet në një grup gjerman me shtrirje globale dhe sot prezanton teknologjitë e saj në një prej panaireve më të rëndësishme të industrisë botërore.
InnoTrans – vitrina globale e industrisë së transportit
InnoTrans 2026, në edicionin e tij jubilar, është i ndarë në pesë sektorë kryesorë: Teknologjia Hekurudhore, Infrastruktura Hekurudhore, Transporti Publik, Dizajni i Brendshëm i Mjeteve dhe Ndërtimi i Tuneleve.
Në këtë hapësirë ndërkombëtare, kompanitë prezantojnë teknologjitë më të reja dhe krijojnë kontakte të reja biznesi me operatorë, prodhues, institucione dhe partnerë nga tregje të ndryshme.
Pjesëmarrja e EKA d.o.o. nga Shkupi është, në këtë kuptim, më shumë se një prezantim komercial. Ajo është një mundësi për të treguar se edhe kompanitë me bazë në Maqedoninë e Veriut mund të jenë pjesë e zinxhirëve globalë të teknologjisë dhe industrisë.
Vizita e Ambasadorit Sela në stendën e EKA-s në Berlin përcjell një mesazh të qartë diplomatik dhe ekonomik: suksesi i kompanive dhe profesionistëve të Maqedonisë së Veriut në Gjermani duhet të shërbejë si urë për investime, partneritete dhe zhvillim të mëtejshëm në vendin e origjinës.
Në një kohë kur konkurrenca për investime, teknologji dhe kapital njerëzor është gjithnjë e më e madhe, diplomacia ekonomike synon të krijojë pikërisht këto ura – ndërmjet suksesit të mërgatës në Gjermani dhe mundësive të reja për ekonominë e Maqedonisë së Veriut.
( Foto nga Ambasada e RMV në Gjermani)
