Përfaqësuesja e Lartë e Bashkimit Evropian për Politikën e Jashtme, Kaja Kallas, ka paralajmëruar për rrezikun e një krize të re globale ushqimore, në kushtet e shtimit të sulmeve ruse ndaj rrugëve të eksportit të produkteve ushqimore të Ukrainës në rajonin e Detit të Zi.
Gjatë një fjalimi para eurodeputetëve në Strasburg, Kallas deklaroi se sistemi global ushqimor po përballet me një kombinim faktorësh që mund të shkaktojnë një krizë të madhe, duke kërcënuar furnizimin me ushqime në mbarë botën.
Sipas saj, thatësirat në të dyja hemisferat, konflikti në Lindjen e Mesme dhe fenomeni klimatik “El Niño”, me intensitet jashtëzakonisht të lartë, po shtojnë pasigurinë për prodhimin dhe furnizimin global me ushqime. Kallas theksoi gjithashtu se sulmet ruse ndaj infrastrukturës bujqësore dhe logjistike të Ukrainës po përkeqësojnë situatën. Ajo renditi mes objektivave portet në Detin e Zi dhe në Danub, pikat e kalimit kufitar, objektet e eksportit, anijet, rrugët detare të transportit dhe depot e magazinimit të drithërave.
Paralajmërimi vjen në një kohë kur Ukraina mbetet një nga furnizuesit e rëndësishëm të tregjeve ndërkombëtare me produkte bujqësore. Çdo ndërprerje e eksporteve të saj mund të ndikojë në disponueshmërinë e drithërave dhe në çmimet e ushqimeve, veçanërisht në vendet që varen nga importet.
Kombinimi i konflikteve, kushteve ekstreme klimatike dhe pengesave në transportin e produkteve bujqësore po shton shqetësimet për sigurinë ushqimore globale, ndërsa Bashkimi Evropian paralajmëron për nevojën e vëmendjes ndaj këtyre rreziqeve, transmeton abcnews.
