Kandidatët që synojnë të marrin nivelin B1 në provimin e gjermanishtes për emigrantët do të duhet të plotësojnë kritere të reja në secilën pjesë të testit. Ndryshimet prekin edhe shqiptarët që ndjekin kurset e integrimit në Gjermani.
Gjermania ka miratuar rregulla të reja për vlerësimin e provimit të gjuhës gjermane për emigrantët, i njohur si “Deutsch-Test für Zuwanderer” (DTZ). Ndryshimet, të publikuara më 20 tetor 2026, do të hyjnë në fuqi më 1 nëntor dhe parashohin kritere më të rrepta për arritjen e nivelit B1. Sipas rregullores së re, kandidatët nuk do të mund të mbështeten vetëm në rezultatet e larta në dy pjesë të provimit, por do të duhet të dëshmojnë njohuri minimale edhe në pjesën e mbetur. Për të marrë vlerësimin B1, kandidati duhet të arrijë këtë nivel në pjesën e të folurit dhe në të paktën njërën prej dy pjesëve të tjera të testit: “Dëgjim/Lexim” ose “Shkrim”. Në pjesën tjetër kërkohet së paku niveli A2.
Kjo do të thotë se kandidatët që arrijnë B1 në të folur dhe në dëgjim e lexim, duhet të sigurojnë të paktën A2 në shkrim. E njëjta vlen edhe për ata që arrijnë B1 në të folur dhe në shkrim, të cilët duhet të marrin së paku A2 në dëgjim dhe lexim.
Deri më tani, për marrjen e rezultatit përfundimtar B1 mjaftonte arritja e këtij niveli në të folur dhe në njërën prej dy pjesëve të tjera, pa pasur një kërkesë minimale të detyrueshme për pjesën e mbetur.
Luftimi i mashtrimeve në provime
Sipas Ministrisë së Brendshme gjermane, ndryshimi synon të parandalojë mashtrimet gjatë provimeve dhe të sigurojë një vlerësim më të besueshëm të njohurive gjuhësore të kandidatëve.
Autoritetet kishin evidentuar raste kur kandidatët përdornin zgjidhje të blera në internet për pjesën “Dëgjim/Lexim”, ndërsa pjesën e shkrimit e linin bosh. Me rregullat e reja, synohet që kandidatët të dëshmojnë njohuri bazë në të gjitha pjesët përkatëse të provimit.
Çfarë do të thotë ndryshimi për shqiptarët në Gjermani?
Rregullat e reja janë veçanërisht të rëndësishme për shqiptarët dhe emigrantët e tjerë që ndjekin kurset e integrimit ose përgatiten për provimin DTZ në Gjermani.
Certifikata e gjuhës mund të jetë e rëndësishme në procedura të ndryshme administrative, përfshirë ato që lidhen me qëndrimin dhe shtetësinë, varësisht nga kërkesat që zbatohen në secilin rast.
Për këtë arsye, kandidatët që do t’i nënshtrohen provimit pas hyrjes në fuqi të ndryshimeve duhet t’i kushtojnë vëmendje të gjitha pjesëve të testit, veçanërisht shkrimit dhe dëgjim-leximit, në mënyrë që të përmbushin kriteret e reja.
Megjithatë, ndryshimi nuk nënkupton që kërkesa e përgjithshme e nivelit të gjuhës për provimin DTZ kalon nga B1 në B2. Bëhet fjalë për një ndryshim në mënyrën e kombinimit dhe vlerësimit të rezultateve, me qëllim që niveli B1 të mbështetet në njohuri të dëshmuara në disa fusha të gjuhës./BS
