Në kuadër të manifestimit “Ditët e Kulturës Shqiptare në Prefekturën e Karlovcit”, u zhvillua një veprimtari e veçantë kulturore, e cila solli në pah pasurinë e trashëgimisë sonë kombëtare, bukurinë e folklorit shqiptar dhe vlerat që na bashkojnë si popull. Manifestimi u karakterizua nga një atmosferë e ngrohtë, plot emocione, krenari dhe dashuri për traditat shqiptare. Përmes valleve tradicionale, veshjeve popullore dhe paraqitjeve artistike, u përcollën te publiku ritmet, ngjyrat dhe bukuria e kulturës sonë, e trashëguar brez pas brezi. Një kontribut të veçantë në këtë aktivitet dhanë grupi i vallëzimit “Kemajl Azizi” nga Vitia, Kosovë, të cilët me interpretimet e tyre artistike sollën para të pranishmëve vlerat e folklorit shqiptar. Përmes valleve dhe kostumeve tradicionale, ata dëshmuan se kultura jonë mbetet një pasuri e gjallë, që ruhet dhe përcillet me përkushtim nga një brez te tjetri.
Një vend të veçantë në këtë manifestim zuri edhe ushqimi tradicional shqiptar, i cili përfaqëson një pjesë të rëndësishme të identitetit dhe trashëgimisë sonë kulturore. Gatimet tradicionale, të përgatitura me dashuri dhe përkushtim, sollën shijen e traditës dhe dëshmuan edhe një herë mikpritjen e njohur shqiptare. Kuzhina jonë tradicionale nuk është vetëm pasuri e shijeve, por edhe simbol i bashkimit, i respektit për të parët tanë dhe i ruajtjes së zakoneve që kanë shoqëruar familjet shqiptare ndër shekuj.
Ky aktivitet ishte më shumë se një manifestim kulturor. Ai përfaqësoi një mundësi të çmuar për të forcuar lidhjet ndërmjet bashkatdhetarëve, për të ruajtur gjuhën shqipe, për të promovuar vlerat tona kombëtare dhe për t’ua përcjellë brezave të rinj dashurinë për kulturën, historinë dhe traditat shqiptare.
Manifestimi u organizua nga Bashkësia Shqiptare e Prefekturës së Karlovcit, në bashkëpunim me Bashkimin e Shqiptarëve në Republikën e Kroacisë, Qytetin e Karlovcit dhe Këshillin e Pakicës Kombëtare Shqiptare. Bashkëpunimi i këtyre institucioneve dhe organizatave dëshmon rëndësinë e angazhimit të përbashkët në ruajtjen, zhvillimin dhe promovimin e kulturës shqiptare në Kroaci.
Falë përkushtimit të organizatorëve, pjesëmarrësve dhe të gjithë atyre që kontribuuan në realizimin e këtij aktiviteti, u krijua një atmosferë e bukur bashkimi, miqësie dhe respekti të ndërsjellë. Njëkohësisht, u dëshmua se shqiptarët, kudo që jetojnë, vazhdojnë ta ruajnë me krenari identitetin e tyre kombëtar dhe të kontribuojnë në jetën kulturore të vendit ku jetojnë.
Tradita jonë është rrënja që na lidh me të kaluarën, kultura është pasuria që na identifikon, ndërsa bashkimi është forca që na mban pranë njëri-tjetrit.
Me krenari për kulturën shqiptare, me respekt për traditën dhe me zemër të hapur ndaj miqësisë e bashkëjetesës!/USHK
