Pamje të papublikuara më parë kanë dalë në dritë nga dhomat e zhveshjes së Dinamos, vetëm pak çaste pas kualifikimit të rëndësishëm ndaj Audas. Atmosfera pa dyshim është elektrizuese.
Lojtarët e festojnë suksesin europian, ndërsa në dhomat e zhveshjes mbërrin presidenti i Dinamos, Ardian Bardhi, i cili e mban fjalën e dhënë dhe e shpërblen skuadrën për eliminimin e Audas.
Paratë shpërndahen mes lojtarëve në mes të festës, shkruan tch, në pamje që tregojnë edhe një herë motivimin e madh brenda kampit “blu”. Por premioja e dhënë pas Audas nuk është shpërblimi i vetëm. Tashmë Dinamo ka përpara sfidën që mund t’i ndryshojë sezonin dhe historinë europiane të klubit.
Më 20 gusht, në “Elbasan Arena”, Dinamo pret Pafos në ndeshjen e parë të Play-Off-it të Conference League. Një javë më pas, më 27 gusht, luhet takimi i kthimit në Qipro.
Nëse Dinamo eliminon Pafos dhe kalon këtë tur, siguron kualifikimin në fazën e grupeve të Conference League.
Dhe për këtë objektiv presidenti Ardian Bardhi ka vendosur një premio të jashtëzakonshme:
500 mijë euro për kualifikimin në grupe
Në këtë betejë europiane janë ende dy skuadra shqiptare.
Egnatia, e cila deri tani ka siguruar 3.870.000 euro nga rrugëtimi europian, luan për një objektiv edhe më të madh. Rrogozhinasit përballen me Lillestrøm në play-off-in e Europa League. Ndeshja e parë luhet më 20 gusht, në orën 19:00, në Rrogozhinë, ndërsa takimi i kthimit zhvillohet më 27 gusht, në orën 19:00, në transfertë. Nëse Egnatia arrin të eliminojë norvegjezët, atëherë siguron një vend në fazën e ligës së Europa League, një tjetër moment historik për klubin, transmeton Bsot.
