Bavarezët dhurojnë spektakël në Bundesligë, me Harry Kane dhe Michael Olise që marrin vëmendjen kryesore
Bayern Munich ka dhuruar një tjetër paraqitje spektakolare në Bundesligë, duke triumfuar me rezultatin e thellë 7-0 ndaj Union Berlinit. Skuadra bavareze e kontrolloi takimin nga minuta e parë deri në fund, duke shfaqur një ritëm të lartë dhe një efikasitet të jashtëzakonshëm përpara portës.
Bayern e gjeti golin e avantazhit në minutën e 18-të, kur Jamal Musiala zhbllokoi sfidën. Union Berlini pati vështirësi të mëdha për të përballuar presionin e vendasve dhe, në minutën e 39-të, Harry Kane dyfishoi rezultatin nga pika e bardhë.
Sulmuesi anglez nuk u mjaftua me vetëm një gol. Në minutën e 54-t, Kane realizoi edhe golin e dytë personal, duke e çuar Bayern-in në një avantazh që praktikisht i dha fund çdo dileme për fituesin.
Pjesa e dytë u shndërrua në një festival të vërtetë golash. Ismael Saibari gjeti rrjetën në minutën e 70-të, ndërsa më pas radha ishte e Michael Olise për të marrë skenën.
Francezi realizoi tre gola dhe kompletoi tripletën e tij personale, duke vulosur një mbrëmje të jashtëzakonshme për Bayern Munich. Sulmet e njëpasnjëshme të bavarezëve e lanë Union Berlin pa përgjigje, ndërsa rezultati përfundimtar, 7-0, pasqyroi dominimin e plotë të skuadrës së Bayern-it.
Me këtë paraqitje, Bayern Munich konfirmoi edhe një herë potencialin e tij ofensiv dhe forcën që mund të prodhojë në fazën sulmuese. Për Union Berlin, nga ana tjetër, ishte një mbrëmje për t’u harruar, pasi skuadra nuk arriti të përballojë ritmin dhe cilësinë e kundërshtarit./TCH
