Ali Ahmeti reagon pas vendimit në Hagë: “Nuk janë dënuar vetëm individët, por edhe historia e Kosovës”
Kreu i Bashkimit Demokratik për Integrim (BDI), Ali Ahmeti, ka reaguar pas vendimit të Gjykatës Speciale në Hagë ndaj katër ish-drejtuesve të Ushtrisë Çlirimtare të Kosovës (UÇK).
Në një intervistë për Euronews Albania, Ahmeti tha se vendimi i Hagës, sipas tij, nuk duhet parë vetëm si një proces gjyqësor ndaj individëve, por si një vendim që prek edhe historinë e luftës së Kosovës dhe figurën e UÇK-së.
“Absolutisht, kjo nuk është e vërtetë që këtu dënohen individët. Këtu dënohet Ushtria Çlirimtare e Kosovës. Këtu dënohet historia e Kosovës. Këtu dënohen të gjitha ato reprezalje gjenocidale që ka ushtruar Serbia ndaj nesh dhe sot po dënohen çlirimtarët”, deklaroi Ahmeti.
Reagimi i tij vjen pas shpalljes së aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit, të cilët u përballën me akuza për krime të kryera gjatë dhe pas luftës së Kosovës.
Sipas vendimit të gjykatës, përgjegjësia penale është përcaktuar në bazë të akuzave dhe provave të paraqitura në proces. Gjykimi lidhet me përgjegjësinë individuale të të akuzuarve dhe nuk përbën një gjykim të UÇK-së si organizatë apo të luftës së Kosovës në tërësi.
Pikërisht në këtë pikë qëndron edhe dallimi mes qëndrimit të Ahmetit dhe përmbajtjes juridike të procesit. Ahmeti e interpreton vendimin si një goditje ndaj UÇK-së dhe historisë së Kosovës, ndërsa procedura gjyqësore në Hagë trajton përgjegjësi individuale penale për veprat për të cilat të akuzuarit janë gjykuar. Deklarata e kreut të BDI-së vjen në një moment me reagime të shumta politike dhe publike në Kosovë, Shqipëri dhe në diasporë, pas vendimit të Dhomave të Specializuara të Kosovës në Hagë. Çështja pritet të vijojë edhe në fazat e tjera të procedurës gjyqësore, përfshirë procesin e apelimit, ndërsa vendimi ka hapur debat të gjerë publik mbi drejtësinë, përgjegjësinë individuale dhe interpretimin e historisë së luftës së Kosovës.
