Kosova po hyn në orët vendimtare për zgjedhjen e presidentit të ri, ndërsa afati kushtetues përfundon nesër dhe ende nuk ka një emër që gëzon mbështetje të mjaftueshme politike. Mungesa e konsensusit ndërmjet partive parlamentare ka thelluar pasigurinë institucionale, duke e vendosur vendin përballë një sfide të rëndësishme politike.
Kryeministri Albin Kurti ka shmangur një përgjigje të drejtpërdrejtë lidhur me mundësinë e mbështetjes së Vjosa Osmani si kandidate për presidente. I pyetur nga gazetarët, ai nuk ka dhënë një qëndrim të qartë, duke lënë të hapur shumë pikëpyetje për drejtimin që do të marrë procesi.
Nga ana tjetër, edhe vetë Osmani ka refuzuar të komentojë zhvillimet politike. Gjatë një paraqitjeje publike në homazhe pranë Monumentit dedikuar Personave të Zhdukur me dhunë gjatë luftës, ajo ka kërkuar që vëmendja të përqendrohet tek respektimi i atyre që kanë humbur jetën, duke shmangur diskutimet për çështjen e presidencës.
Ndërkohë, përpjekjet për të gjetur një zgjidhje vazhdojnë. Lëvizja Vetëvendosje ka propozuar që dy partitë kryesore opozitare, Partia Demokratike e Kosovës dhe Lidhja Demokratike e Kosovës, të sjellin nga tre kandidatë për postin e presidentit. Sipas kësaj oferte, LVV-ja do të siguronte nënshkrimet e nevojshme dhe do të mbështeste njërin prej kandidatëve në procesin e votimit.
Megjithatë, kjo nismë nuk është pritur njësoj nga opozita. PDK-ja e ka refuzuar kategorikisht propozimin, ndërsa LDK-ja ka vendosur kushte, duke përmendur në mënyrë të drejtpërdrejtë emrin e Vjosa Osmanit si një nga opsionet e pranueshme.
Në mungesë të një marrëveshjeje, rrezikohet që procesi të dështojë për shkak të mungesës së kuorumit, pasi kërkohet pjesëmarrja e të paktën 80 deputetëve për zhvillimin e votimit. Kjo situatë rrit presionin mbi spektrin politik për të arritur një kompromis në momentet e fundit.
Me përfundimin e mandatit pesëvjeçar të Osmanit këtë muaj, vendi mbetet në një udhëkryq institucional, ku çdo vonesë apo dështim për zgjedhjen e presidentit mund të ketë pasoja të gjera për stabilitetin politik dhe funksionimin e institucioneve, transmeton rtk.
