Blerjet në Gjermani mund të bëhen edhe më të leverdishme për qytetarët që jetojnë në Zvicër. Qeveria gjermane planifikon të heqë kufirin minimal prej 50 eurosh për përfitimin e rimbursimit të TVSH-së. Në të ardhmen, edhe blerjet me vlera të vogla mund të përfitojnë nga ky lehtësim, transmeton 20min.ch. Një lajm i mirë po vjen për mijëra qytetarë që jetojnë në Zvicër dhe bëjnë rregullisht blerje në Gjermani. Kufiri minimal prej 50 eurosh, i cili deri më tani ishte kusht për të marrë dokumentin e eksportit dhe për të kërkuar kthimin e TVSH-së, mund të hiqet së shpejti. Ndryshimi parashikohet në projektligjin gjerman për Ligjin Vjetor të Tatimeve 2026. Me heqjen e të ashtuquajturës Bagatellgrenze, konsumatorët do të mund të kërkojnë rimbursimin e TVSH-së edhe për blerje nën 50 euro.
Kur hyn në fuqi ky ndryshim?
Heqja e kufirit prej 50 eurosh është e lidhur drejtpërdrejt me futjen në përdorim të sistemit digjital të dokumentit të eksportit, i njohur si dAKZ.
Sipas deputetit gjerman të CDU-së, Felix Schreiner, heqja e kufirit është parashikuar ligjërisht dhe do të zbatohet me prezantimin zyrtar të sistemit të ri digjital.
Aktualisht, aplikacioni ndodhet ende në fazën pilotuese. Në këtë projekt po marrin pjesë edhe disa kompani të njohura, përfshirë Lidl-in, në 25 filiale pranë kufirit me Zvicrën.
Si do të funksionojë aplikacioni i ri?
Sistemi digjital synon ta bëjë shumë më të thjeshtë procedurën e kthimit të TVSH-së.
Konsumatorët do të duhet të përdorin aplikacionin për të gjeneruar një barkod, të cilin do ta skanojnë në arkën e dyqanit gjatë pagesës. Në këtë mënyrë, fatura regjistrohet në mënyrë digjitale.
Më pas, aplikacioni përdor të dhënat e vendndodhjes për të identifikuar momentin kur mallrat largohen nga territori gjerman dhe gjeneron automatikisht dokumentin e eksportit.
Kjo do të thotë se nuk do të jetë më e nevojshme që faturat të vulosen fizikisht në doganë, siç ndodh me procedurën aktuale.
Kur pritet të fillojë sistemi i ri?
Sipas planifikimit aktual të autoriteteve gjermane, synimi është që sistemi digjital të kalojë në funksionim të rregullt gjatë vitit 2026. Megjithatë, ende nuk ka një datë përfundimtare të konfirmuar.
Nëse sistemi nuk hyn në funksionim të rregullt gjatë këtij viti, kufiri prej 50 eurosh do të vazhdojë të jetë në fuqi deri më 31 dhjetor 2027.
Për konsumatorët që jetojnë në Zvicër, ky ndryshim do të ishte një lehtësim i rëndësishëm, pasi do t’u mundësonte të kërkonin kthimin e TVSH-së edhe për blerje të vogla në Gjermani.
Pra, blerjet nën 50 euro mund të përfitojnë së shpejti nga kthimi i TVSH-së, por gjithçka varet nga hyrja zyrtare në funksionim e sistemit të ri digjital, transmeton 20min.ch, përcjell helveticALforum.ch (Foto ilustrim)
