Anketa e realizuar nga Fakulteti Juridik evidenton interesimin e kandidatëve potencialë për programin e ri të studimeve, me theks të veçantë në administratën publike, qeverisjen moderne dhe transformimin digjital.
PEJË – Fakulteti Juridik i Universitetit “Haxhi Zeka” në Pejë ka regjistruar tregues pozitivë të interesimit për programin e ri të propozuar të studimeve Bachelor i Shkencave (BSc) në Administratë, Qeverisje dhe Menaxhim Digjital. Këto rezultate dalin nga një anketë e realizuar me kandidatët potencialë gjatë periudhës 25 tetor – 2 nëntor 2026, në të cilën janë analizuar 73 përgjigje të vlefshme. Të dhënat e anketës tregojnë se programi i propozuar ka potencial të mirë për të tërhequr studentë të rinj, duke reflektuar interesimin në rritje për profile studimore që ndërthurin njohuritë juridike dhe administrative me qeverisjen, menaxhimin dhe teknologjinë digjitale.
Sipas rezultateve, 71,2 për qind e pjesëmarrësve kanë shprehur interesim të lartë për këtë program, duke e vlerësuar atë me notat 4 dhe 5 në shkallën nga 1 deri në 5. Mesatarja e interesimit është 4,08, ndërsa 45,2 për qind e të anketuarve kanë shprehur interesimin maksimal. Një tjetër tregues i rëndësishëm është fakti se 53,4 për qind e pjesëmarrësve e konsiderojnë këtë program si zgjedhjen e tyre të parë ose ndër alternativat kryesore për vazhdimin e studimeve universitare. Kjo dëshmon se profili i propozuar përputhet me pritshmëritë dhe interesimet akademike të një pjese të konsiderueshme të kandidatëve potencialë.
Punësimi dhe praktika profesionale, ndër faktorët kryesorë të interesimit
Perspektiva e punësimit paraqitet si një ndër elementet më të rëndësishme në vlerësimin e programit. Rreth 76,7 për qind e pjesëmarrësve kanë dhënë vlerësim pozitiv për mundësitë e punësimit pas përfundimit të studimeve, ndërsa 71,2 për qind e tyre e konsiderojnë punësimin si faktor përcaktues në zgjedhjen e programit akademik. Po ashtu, rëndësi e veçantë i është kushtuar praktikës profesionale. Rreth 80,8 për qind e të anketuarve vlerësojnë se praktika duhet të ketë rol të rëndësishëm në kuadër të programit të studimeve. Ky rezultat nënvizon nevojën që përgatitja teorike të shoqërohet me përvojë konkrete në institucione publike, komuna, organizata dhe sektorë të tjerë relevantë.
Sa i përket orientimit profesional, institucionet publike qendrore janë identifikuar si sektori më i preferuar për punësim, me 67,1 për qind të përgjigjeve, ndërsa komunat dhe shërbimet qytetare janë përmendur nga 35,6 për qind e pjesëmarrësve.
Qeverisja, njohuritë juridike dhe inteligjenca artificiale në fokus
Rezultatet e anketës evidentojnë gjithashtu fushat në të cilat kandidatët potencialë presin të fitojnë njohuri dhe kompetenca profesionale. Qeverisja dhe politikat publike, si dhe njohuritë juridike dhe administrative, janë vlerësuar si fusha veçanërisht të rëndësishme nga 46,6 për qind e pjesëmarrësve për secilën kategori. Ndërkaq, sistemet digjitale dhe inteligjenca artificiale janë vlerësuar si fushë me rëndësi nga 38,4 për qind e të anketuarve. Këto të dhëna pasqyrojnë nevojën për profile të reja profesionale, të cilat janë në gjendje të përballojnë sfidat e administratës bashkëkohore, të kontribuojnë në përmirësimin e shërbimeve publike dhe të mbështesin proceset e transformimit digjital në institucione.
Një hap drejt modernizimit të ofertës akademike
Programi i propozuar BSc në Administratë, Qeverisje dhe Menaxhim Digjital synon të krijojë një profil të ri akademik, duke integruar dimensionin juridik dhe administrativ me politikat publike, menaxhimin institucional, teknologjinë dhe sistemet digjitale. Përmes këtij programi, Fakulteti Juridik synon të kontribuojë në përgatitjen e kuadrove të reja profesionale për administratën publike, institucionet qendrore dhe lokale, si dhe për organizatat dhe sektorët që kërkojnë ekspertizë në menaxhim, qeverisje dhe transformim digjital.
Rezultatet e anketës përbëjnë një bazë të rëndësishme orientuese për zhvillimin dhe arsyetimin e programit të ri, duke ndihmuar në përafrimin e ofertës akademike me interesimin e kandidatëve, nevojat e tregut të punës dhe zhvillimet bashkëkohore në fushën e administratës dhe teknologjisë. Interesimi i evidentuar përmes kësaj ankete përbën një sinjal pozitiv për rëndësinë e zgjerimit dhe modernizimit të ofertës studimore të Universitetit “Haxhi Zeka”, në funksion të përgatitjes së profesionistëve të rinj dhe ndërtimit të një administrate më efikase, transparente dhe të orientuar drejt qytetarit. Universiteti “Haxhi Zeka” në Pejë vazhdon të synojë zhvillimin e programeve studimore që ndërthurin dijen akademike me nevojat e shoqërisë dhe sfidat e së ardhmes, njofton UHZ, transmeton helveticALfoum.ch
