Presidenti i Shteteve të Bashkuara, Donald Trump, ka bërë të ditur se Uashingtoni do të ndërpresë në fund të këtij viti ndihmën e rregullt financiare ushtarake për Izraelin, pas një marrëveshjeje të arritur muaj më parë me kryeministrin izraelit, Benjamin Netanyahu. Gjatë një interviste për emisionin “Fox & Friends” të televizionit Fox News, Trump deklaroi se Izraeli nuk ka më nevojë për mbështetjen financiare të vazhdueshme amerikane, duke konfirmuar se vendimi për përfundimin e pagesave ishte diskutuar dhe dakordësuar prej kohësh mes dy palëve.
“Unë dhe Bibi Netanyahu kemi rënë dakord t’i japim Izraelit 4 miliardë dollarë në vit dhe po i ndalojmë. Kjo marrëveshje u bë muaj më parë”, u shpreh presidenti amerikan.
Sipas Trump, duke filluar nga fundi i këtij viti, Shtetet e Bashkuara nuk do të vazhdojnë më dhënien e pagesave të rregullta financiare për Izraelin. Megjithatë, ai theksoi se kjo nuk nënkupton ndërprerjen e plotë të mbështetjes amerikane, pasi Uashingtoni do të mbetet i gatshëm të ndërhyjë nëse Izraeli përballet me situata që kërkojnë ndihmë.
“Sigurisht, do ta ndihmojmë Izraelin nëse lind nevoja”, deklaroi Trump.
Gjatë intervistës, presidenti amerikan foli edhe për debatin politik në Shtetet e Bashkuara lidhur me financimin e Izraelit. Ai kritikoi qëndrimet e disa demokratëve dhe politikanëve të krahut të majtë, të cilët kanë kundërshtuar vazhdimin e ndihmës financiare dhe ushtarake amerikane për qeverinë izraelite.
Deklaratat e Trump vijnë në një moment kur marrëdhëniet mes Uashingtonit dhe Tel Avivit, si dhe roli i mbështetjes amerikane në sigurinë e Izraelit, mbeten çështje të rëndësishme në debatin politik ndërkombëtar.
Megjithatë, mbetet për t’u parë se si do të zbatohet konkretisht ky vendim dhe çfarë ndikimi do të ketë në bashkëpunimin ushtarak dhe strategjik mes dy vendeve në të ardhmen, transmeton abcnews.
