Kryeministri i Kosovës, Albin Kurti, ka udhëtuar drejt Malit të Zi, ku do të përfaqësojë vendin në Samitin e Procesit të Berlinit. Në kuadër të këtij samiti, ai pritet të zhvillojë takime bilaterale me përfaqësues të institucioneve ndërkombëtare dhe liderë shtetesh.
Kryeministri i Republikës së Kosovës, Albin Kurti, sot është nisur drejt Malit të Zi për të marrë pjesë në Samitin e Procesit të Berlinit, bëhet e ditur në njoftimin e Kryeministrisë së Kosovës.
Sipas njoftimit zyrtar, gjatë këtij samiti, Kurti do të zhvillojë takime bilaterale me drejtues dhe përfaqësues të institucioneve ndërkombëtare, si dhe me zyrtarë të lartë e krerë shtetesh.
Samiti i Procesit të Berlinit përbën një platformë të rëndësishme për forcimin e bashkëpunimit ndërmjet vendeve të Ballkanit Perëndimor, me fokus në integrimin evropian, zhvillimin ekonomik dhe thellimin e marrëdhënieve rajonale.
Ndërkohë, Ambasada Gjermane në Prishtinë, përmes një postimi në Facebook, ka theksuar rëndësinë e këtij procesi për avancimin e bashkëpunimit rajonal dhe afrimin e vendeve të Ballkanit Perëndimor me Bashkimin Evropian.
Sipas ambasadës, synimi i Gjermanisë është i qartë: të gjashtë partnerët e Ballkanit Perëndimor të bëjnë përparim drejt anëtarësimit në Bashkimin Evropian.
Procesi i Berlinit, i iniciuar nga Gjermania në vitin 2014, synon të forcojë lidhjet ndërmjet vendeve të rajonit dhe të mbështesë rrugën e tyre drejt integrimit evropian.
Pjesëmarrja e Kosovës në këtë samit vjen në kuadër të përpjekjeve për të thelluar bashkëpunimin me partnerët rajonalë dhe ndërkombëtarë, si dhe për të avancuar perspektivën evropiane të vendit, transmeton rtk.
