Zvicra po përballet ende me një deficit të madh reshjesh pas një vere jashtëzakonisht të nxehtë dhe të thatë. Meteorologu i MeteoSwiss, Adrien Michel, thotë se vendit aktualisht i mungojnë rreth tre muaj reshje normale, ndërsa parashikimet tregojnë se moti i thatë do të vazhdojë edhe në fillim të tetorit, transmeton 20min.ch. Pas një vere me temperatura të larta dhe reshje të pakta, thatësira vazhdon të mbajë nën presion pjesë të mëdha të Zvicrës. Sipas meteorologut të MeteoSwiss, Adrien Michel, vendit aktualisht i mungojnë rreth tre muaj reshje. Në një deklaratë për RTS, Michel ka shpjeguar se për të shmangur thellimin e mëtejshëm të deficitit do të nevojiteshin rreth tre muaj me sasi normale reshjesh. Për rikuperimin e plotë të deficitit do të duheshin edhe më shumë reshje, me rreth dyfishin e mesatares për një periudhë disa mujore. Edhe muaji shtator nuk ka sjellë lehtësimin e pritur. Përveç disa reshjeve në fillim të muajit, pjesa tjetër është karakterizuar nga presioni i lartë atmosferik, moti i thatë dhe me shumë diell, si dhe temperatura mbi mesataren. Nëse kjo situatë vazhdon, shtatori mund të renditet ndër dhjetë muajt më të thatë që nga fillimi i matjeve meteorologjike në Zvicër, ndërsa në rrafshin zviceran mund të jetë edhe i dyti më i thatë.
Fermerët përballen me probleme në bujqësi
Pasojat e mungesës së reshjeve janë veçanërisht të dukshme në bujqësi. Fermeri Fabrice Bersier nga Vesin, në kantonin e Friburgut, ka mbjellë para rreth tri javësh bimë foragjere me shpresën për të kompensuar mungesën e ushqimit për kafshët gjatë verës. Por, sipas raportimit të RTS, farërat nuk kanë mbirë siç pritej. Probleme janë shfaqur edhe me farat e sapombjella të kolzës. Mungesa e ujit po pengon mbirjen dhe rritjen e kulturave bujqësore.
“Kur ka mungesë uji, disa fara nuk mbijnë dhe potenciali i rendimentit për korrjen e vitit 2027 bie”, ka deklaruar Bersier. Situata paraqet vështirësi edhe për kulturat e tjera të vjeshtës, të cilat duhet të mbijnë dhe të zhvillohen para ardhjes së dimrit.
Moti i thatë vazhdon edhe ditët në vijim
Edhe parashikimet e motit nuk sjellin për momentin ndryshimin e shumëpritur. Të martën dhe të mërkurën, në Cyrih dhe Zvicrën Lindore, në Bernë, rrafshin qendror dhe Zvicrën Qendrore pritet të mbizotërojë mot me diell, me temperatura nga 20 deri në 23 gradë Celsius. Të enjten pritet shtim i vranësirave, veçanërisht në pjesën lindore të vendit, por reshjet do të mbeten të pakta dhe pjesa më e madhe e këtyre rajoneve do të vazhdojë të jetë e thatë. Nga e premtja pritet rikthimi i motit anticiklonik. Fundjava parashikohet të jetë me diell dhe pa reshje, ndërsa temperaturat në shumë zona mund të arrijnë rreth 25 gradë Celsius ose edhe më shumë. Sipas MeteoNews, temperatura të tilla në fund të shtatorit konsiderohen të pazakonta.
Nuk shihet ende ndryshim i motit
Edhe për periudhën nga 28 shtatori deri më 4 tetor, MeteoSwiss parashikon dominim të presionit të lartë atmosferik, me ditë kryesisht me diell dhe të thata. Temperaturat maksimale pritet të lëvizin ndërmjet 21 dhe 26 gradë Celsius. Për fermerët, peshkatarët dhe tokat e thara, kjo nënkupton se pritja për reshjet e shumëpritura do të vazhdojë. Thatësira e zgjatur po krijon vështirësi në bujqësi dhe në ekosistemet ujore, ndërsa mungesa e reshjeve pritet të mbetet një nga çështjet kryesore meteorologjike dhe bujqësore të javëve të ardhshme në Zvicër, transmeton 20min.ch, përcjell helveticALforum.ch.
Foto ilustrim nga D. H
