Zvicër – Një valë e fuqishme stuhish përfshiu pjesë të Zvicrës gjatë mbrëmjes së së martës dhe natës drejt së mërkurës, duke sjellë mijëra vetëtima, reshje dhe erëra me intensitet të jashtëzakonshëm, përgatiti 20min.ch. Sipas të dhënave të publikuara nga MeteoNews, gjatë natës në gjithë vendin u regjistruan rreth 12 mijë vetëtima, duke e bërë këtë një nga episodet më të fuqishme të motit të këtij lloji në muajin shtator. Por spektakli i natyrës nuk u kufizua vetëm te vetëtimat. Erërat arritën shpejtësi të nivelit të stuhive të fuqishme. Në Steckborn, në kantonin Thurgau, u matën rreth 110 km/h, ndërsa në Hörnli, në kantonin e Cyrihut, shpejtësia arriti deri në 116 km/h. Sipas shkallës së Beaufort-it, erërat mbi 100 km/h klasifikohen si erëra me karakter orkanik. Qielli mbi shumë pjesë të vendit u ndriçua vazhdimisht nga vetëtimat, ndërsa erërat e fuqishme dhe reshjet e shoqëruan këtë episod të pazakontë atmosferik.
Zvicra, një vend i njohur për stabilitetin dhe parashikueshmërinë e infrastrukturës së saj, u përball kështu me një tjetër dëshmi se ndryshimet e motit mund të jenë të papritura dhe jashtëzakonisht intensive.Natyra edhe një herë tregoi forcën e saj. Një natë me 12 mijë vetëtima nuk është thjesht një shifër meteorologjike – është një spektakël i fuqishëm i qiellit dhe një kujtesë se, përballë forcave të natyrës, njeriu mbetet vetëm një dëshmitar, përgatiti 20min.ch, përcjell helveticALforum.ch.
