ETH Zürich është universiteti më i mirë zviceran në renditjen e këtij viti të Shanghai Ranking, duke u ngjitur në vendin e 19-të në botë. Instituti Federal Zviceran i Teknologjisë përmirësoi pozicionin e tij me tri vende krahasuar me vitin e kaluar dhe rikthehet në të njëjtën pozitë që kishte në vitin 2016, transmeton 20min.ch. Në krye të renditjes botërore qëndron Universiteti i Harvardit, i ndjekur nga Stanford dhe MIT. Dymbëdhjetë vendet e para dominohen nga universitete amerikane dhe britanike.
Pesë universitete zvicerane në Top 100
Zvicra konfirmon edhe këtë vit praninë e saj të fortë në elitën akademike botërore. Pas ETH-së, në vendin e 43-të renditet EPFL në Lozanë. Universiteti i Gjenevës zë vendin e 55-të, Universiteti i Cyrihut vendin e 65-të, ndërsa Universiteti i Bazelit renditet i 91-ti.
ETH ka ruajtur prej vitesh një pozicion të fortë në këtë renditje. Në edicionin e parë të Shanghai Ranking, në vitin 2003, ai ishte në vendin e 25-të dhe që atëherë ka qëndruar vazhdimisht mes universiteteve më të mira të botës. Renditja e Shanghai Ranking Consultancy bazohet në gjashtë kritere, ndër të tjera në numrin e laureatëve të Nobelit dhe fituesve të Medaljes Fields, studiuesit më të cituar dhe publikimet në revistat shkencore Nature dhe Science. Megjithatë, renditja është kritikuar vazhdimisht sepse kriteret e saj fokusohen kryesisht te kërkimi shkencor dhe rezultatet akademike, ndërsa cilësia e mësimdhënies luan një rol shumë më të vogël. Pavarësisht këtyre kritikave, rezultatet e këtij viti e konfirmojnë sërish pozitën e Zvicrës si një prej vendeve më të fuqishme në arsimin e lartë dhe kërkimin shkencor në Evropë, transmeton 20min.ch, përcjell helveticALForum.ch.
