Nga Dashnim Hebibi
Në kohën kur teknologjia dhe rrjetet sociale dominojnë jetën e përditshme, libri vazhdon të mbetet një nga mjetet më të fuqishme të ruajtjes së kujtesës, vlerave dhe historisë së njerëzve që lënë gjurmë në shoqëri. Një dëshmi e tillë është edhe libri “Dritëhijet e një rrugëtimi diplomatik”, kushtuar Ambasadorit të Republikës së Maqedonisë së Veriut në Konfederatën Zvicerane, Shkëlqesisë së Tij Rexhep Demiri. Kjo vepër voluminoze, me 574 faqe, është fryt i punës së autorëve PhD Dashnim Hebibi dhe Florim Useini, të cilët me përkushtim kanë dokumentuar dhe pasqyruar jetën, veprimtarinë dhe rrugëtimin diplomatik të ambasadorit Demiri. Libri është botuar nga Shtëpia Botuese “Libri Im” në Pejë, ndërsa përgatitja teknike dhe artistike është realizuar me profesionalizëm nga maestro Berat Thaçi, i cili ka punuar edhe kopertinat e veprës. Redaktor dhe recenzent i librit është Jeton Arifi, i cili me kujdes ka kontribuar në formësimin përfundimtar të kësaj vepre me vlerë.
“Dritëhijet e një rrugëtimi diplomatik” nuk është thjesht një biografi. Ajo është një kronikë e gjallë e përkushtimit institucional, e angazhimit diplomatik dhe e kontributit të një personaliteti që ka ditur të përfaqësojë me dinjitet shtetin dhe interesat e qytetarëve të tij në arenën ndërkombëtare. Nëpërmjet rrëfimeve, dokumenteve, dëshmive dhe analizave, lexuesi njihet me sfidat dhe sukseset e një diplomati që ka ndërtuar ura bashkëpunimi dhe komunikimi në periudha të ndryshme të karrierës së tij. Një ndër arsyet pse kjo vepër po gjen jehonë të veçantë te lexuesit është edhe personaliteti i ambasadorit Rexhep Demiri. Si Ambasador i Republikës së Maqedonisë së Veriut në Zvicër, ai ka arritur të krijojë një afërsi të veçantë me bashkatdhetarët tanë, duke u bërë një figurë e respektuar dhe shumë e dashur për mërgatën shqiptare. Përmes angazhimit të tij institucional, komunikimit të hapur dhe gatishmërisë për të qenë pranë bashkatdhetarëve në aktivitetet kulturore, kombëtare dhe shoqërore, ai ka fituar respekt dhe besim të veçantë në mesin e komunitetit shqiptar në Zvicër.
Mërgimtarët e vlerësojnë ambasadorin Demiri për qasjen e tij njerëzore, për urtësinë, profesionalizmin dhe përkushtimin në forcimin e lidhjeve ndërmjet mërgatës dhe institucioneve shtetërore. Ai ka dëshmuar se diplomacia nuk është vetëm përfaqësim zyrtar i shtetit, por edhe ndërtim urash mirëkuptimi, bashkëpunimi dhe afërsie mes njerëzve. Pikërisht këto cilësi e kanë bërë atë një figurë unifikuese dhe të respektuar nga të gjithë ata që e njohin dhe bashkëpunojnë me të. Rëndësia e kësaj vepre po dëshmohet çdo ditë nga interesimi që ajo po zgjon te lexuesit, veçanërisht te mërgata shqiptare. Një rast domethënës ndodhi gjatë një udhëtimi me aeroplan në linjën Cyrih–Shkup. Në mesin e udhëtarëve, vëmendjen ma tërhoqi një bashkatdhetare nga Republika e Maqedonisë së Veriut, e cila po lexonte me interes dhe admirim librin “Dritëhijet e një rrugëtimi diplomatik”.
Teksa faqet e librit kalonin njëra pas tjetrës, dukej qartë se lexuesja ishte e përfshirë në përmbajtjen e tij. Pas një bisede të rastësishme, kur kuptoi se edhe unë ndodhesha në të njëjtin fluturim, biseda jonë u përqendrua te figura e ambasadorit Rexhep Demiri dhe mesazhet që përcjell kjo vepër. Ajo e vlerësoi ambasadorin si një personalitet të veçantë, të urtë, komunikues, të suksesshëm dhe unifikues, i cili gjatë veprimtarisë së tij ka fituar respektin e bashkëpunëtorëve, institucioneve dhe bashkatdhetarëve. Sipas saj, libri arrin të paraqesë jo vetëm sukseset profesionale të ambasadorit, por edhe dimensionin e tij njerëzor, duke e bërë figurën e tij më të afërt dhe më të kuptueshme për publikun. Ky moment në aeroplan ishte një dëshmi se libri ka filluar të jetojë jetën e vet. Ai nuk qëndron më vetëm në raftet e bibliotekave apo në tavolinat e studiuesve. Ai udhëton me njerëzit, kalon kufij shtetërorë, hyn në shtëpitë e mërgimtarëve dhe bëhet pjesë e bisedave, reflektimeve dhe kujtimeve të tyre. Në fakt, kjo është fuqia e vërtetë e librit. Ai krijon lidhje mes njerëzve që nuk njihen me njëri-tjetrin, por që bashkohen përmes interesimit ndaj një vepre ose një personaliteti. Një libër i mirë bëhet urë komunikimi mes brezave, mes vendeve dhe mes kohëve të ndryshme. Figura e ambasadorit Rexhep Demiri, e trajtuar në këtë vepër, paraqitet si shembull i përkushtimit ndaj profesionit, dialogut dhe bashkëpunimit. Në një kohë kur shoqëritë kanë nevojë për modele pozitive, dokumentimi i personaliteteve të tilla merr rëndësi të veçantë. Prandaj, ky libër nuk është vetëm një përmbledhje faktesh dhe ngjarjesh, por edhe një burim frymëzimi për të rinjtë që synojnë të ndjekin rrugën e diplomacisë, të shërbimit publik dhe të angazhimit shoqëror.
Merita të veçanta u takojnë autorëve PhD Dashnim Hebibi dhe Florim Useini, të cilët kanë arritur të ndërthurin me sukses dokumentimin historik me rrëfimin publicistik. Po ashtu, puna profesionale e redaktorit dhe recenzentit Jeton Arifi, si dhe përkushtimi i maestros Berat Thaçi në aspektin grafik dhe botues, kanë ndikuar që libri të paraqitet në një nivel të lartë profesional dhe estetik. Në fund, mbetet e vërteta e madhe se njerëzit largohen, por veprat mbeten. Librat janë dëshmitarët më besnikë të kohës. Ata ruajnë kujtesën, përjetësojnë kontributet dhe ua përcjellin brezave të ardhshëm historitë e atyre që kanë lënë gjurmë.
“Dritëhijet e një rrugëtimi diplomatik” është pikërisht një vepër e tillë. Ajo ka nisur tashmë rrugëtimin e saj në duart e lexuesve, në bibliotekat familjare dhe në zemrat e bashkatdhetarëve tanë kudo në botë. Sot lexohet në Pejë, Shkup, Prishtinë, Tiranë, Bernë e Cyrih; nesër do të lexohet nga breza të tjerë, të cilët përmes saj do të njohin një kapitull të rëndësishëm të diplomacisë dhe të veprimtarisë sonë kombëtare. Kjo është pavdekësia e librit: të vazhdojë të flasë edhe atëherë kur ne nuk do të jemi më, duke mbetur një pasuri e përhershme kulturore, historike dhe shpirtërore.
