Zvicra vazhdon të mbetet një nga destinacionet më të dashura në botë për adhuruesit e natyrës dhe maleve. Nga majat alpine e deri te liqenet malore, vendi ofron panorama spektakolare që tërheqin çdo vit mijëra turistë vendas dhe të huaj. Në mesin e qindra vendeve të bukura, disa pika panoramike konsiderohen të paharrueshme dhe janë kthyer në simbole të bukurisë natyrore zvicerane. Komuniteti i lexuesve të gazetës zvicerane “Blick” ka përzgjedhur dhjetë nga vendet më mbresëlënëse për të shijuar panoramën alpine. Disa prej tyre arrihen vetëm me ecje malore, ndërsa të tjerat mund të vizitohen me teleferik ose makinë.
Stockhorn – Bernë
Një nga destinacionet më të preferuara është Stockhorn, pranë Erlenbach në kantonin e Bernës. Maja 2190 metra e lartë ofron pamje madhështore mbi Alpet dhe luginat përreth. Vizitorët thonë se panorama aty nuk humbet kurrë bukurinë, pavarësisht sa herë e viziton.
Schynige Platte – Interlaken
Schynige Platte konsiderohet një nga pikat më ikonike përballë treshes së famshme alpine Eiger, Mönch dhe Jungfrau. Pamja romantike mbi majat e mbuluara me borë e bën këtë vend një parajsë për fotografët dhe turistët.
Muottas Muragl – Engadin
Në rajonin e Engadinit, Muottas Muragl ofron pamje të jashtëzakonshme mbi liqenet e Oberengadinit dhe Alpet përreth. Ky vend është veçanërisht i njohur për perëndimet spektakolare të diellit.
“Il Spir” – Flims
Platforma panoramike “Il Spir” në Graubünden ofron një pamje 180-gradëshe mbi grykën e famshme të Rinit, Ruinaulta, e njohur edhe si “Grand Canyon-i zviceran”. Gryka arrin thellësi deri në 400 metra dhe është një nga mrekullitë natyrore më të veçanta të Zvicrës.
Stanserhorn – Nidwalden
Stanserhorn është një nga malet më të dashura për familjet dhe turistët. Nga aty mund të shihen dhjetë liqene dhe mbi 100 kilometra vargmal alpin. Avantazhi i këtij mali është se nuk ndodhet shumë lart, duke lejuar një pamje të qartë edhe mbi jetën në lugina.
Chapf – Amden-Arvenbühl
Pika panoramike Chapf në St. Gallen ofron pamje të mrekullueshme mbi malet e Glarusit, liqenin Walensee dhe fushën e Linth-it. Sidomos në ditët e kthjellëta, panorama konsiderohet ndër më të bukurat në Zvicrën lindore.
Cardada – Locarno
Platforma panoramike në Cardada, e projektuar nga arkitekti i njohur Mario Botta, ofron pamje të mrekullueshme mbi Lago Maggiore, Centovalli dhe Monte Rosa. Ky vend është një kombinim perfekt mes arkitekturës moderne dhe natyrës alpine.
Eggishorn – Valais
Nga Eggishorn mund të shihet i gjithë akullnaja Aletsch, akullnaja më e madhe në Alpe, si dhe rreth 40 maja mbi 4000 metra lartësi. Shumë turistë e konsiderojnë këtë pamje si një nga më mbresëlënëset në Evropë.
Gornergrat – Zermatt
Gornergrat pranë Zermatt-it është një nga vendet më të famshme turistike në Zvicër. Nga aty shihet Matterhorn-i legjendar dhe një panoramë e gjerë mbi akullnajat alpine.
Bachtel – Cyrih
Edhe rajoni i Cyrihut ka një pikë panoramike të veçantë. Nga maja e Bachtel-it mund të shihen Alpet nga Säntis deri në Jungfrau, si dhe Jura, Pylli i Zi në Gjermani dhe pjesë të liqenit të Cyrihut.
Zvicra, parajsa e panoramave alpine
Këto vende tregojnë pse Zvicra vazhdon të konsiderohet një nga destinacionet më spektakolare malore në botë. Panorama të paharrueshme, shtigje të mirëmbajtura dhe natyrë e paprekur i bëjnë Alpet zvicerane një përvojë unike për çdo vizitor. Për shumë turistë, këto pamje nuk janë vetëm vende për fotografi, por momente që mbeten gjatë në kujtesë, transmeton blickch, percjell helveticALForum.ch.
