Instituti Albanologjik i Prishtinës do të organizojë edicionin e shtatëmbëdhjetë të konferencës shkencore “Java e Albanologjisë”, një nga ngjarjet më të rëndësishme akademike në fushën e studimeve shqiptare. Konferenca do të mbahet nga 18 deri më 25 maj 2026 dhe pritet të mbledhë studiues, profesorë, hulumtues dhe përfaqësues të institucioneve shkencore nga trojet shqiptare dhe më gjerë.
Sipas sekretarit shkencor të institutit, Adil Olluri, aktiviteti do të nisë të hënën, më 18 maj, në ora 10:00, duke shënuar fillimin e një jave të pasur me diskutime, analiza dhe prezantime shkencore mbi çështjet më aktuale të albanologjisë.
Organizatorët theksojnë se konferenca po fiton rëndësi gjithnjë e më të madhe nga viti në vit, duke u shndërruar në një platformë të fuqishme të debatit akademik dhe të shkëmbimit të ideve mbi gjuhën, letërsinë, historinë, kulturën dhe traditat shqiptare.
“Java e Albanologjisë” do të zhvillohet përmes pesë sesioneve tematike:
- Sesioni i Gjuhësisë – “Shqipja në rrethanat e sotme digjitale”, më 18 maj 2026;
- Sesioni i Letërsisë – “Letërsia shqipe dhe konteksti”, më 19 maj 2026;
- Sesioni i Historisë – “Historiografia shqiptare përballë historiografisë evropiane”, më 20 maj 2026;
- Sesioni i Folklorit dhe Etnomuzikologjisë – “Trashëgimia kulturore si kujtesë: këngët, rrëfimet, fotografitë”, më 21 maj 2026;
- Sesioni i Etnologjisë – “Antropologjia e ushqimit në kontekstin shqiptar: vazhdimësi dhe ndryshim”, më 22 maj 2026.
Përmes këtyre temave, konferenca synon të trajtojë sfidat bashkëkohore të studimeve albanologjike, duke ofruar hapësirë për reflektim shkencor dhe bashkëpunim ndërinstitucional.
Organizatorët kanë ftuar edhe gazetarët dhe përfaqësuesit e mediave që të ndjekin nga afër punimet e konferencës, e cila konsiderohet si një dritare e rëndësishme e mendimit akademik shqiptar dhe një forum i vlefshëm për promovimin e trashëgimisë kulturore dhe shkencore shqiptare, transmeton rtk.
