Kryeministri Edi Rama ka publikuar një video nga takimi i tij me Presidentin e Emirateve të Bashkuara Arabe, Sheikh Mohammed Bin Zayed Al Nahyan, gjatë vizitës në Abu Dabi.
Në mesazhin shoqërues, Rama e ka cilësuar takimin si “vëllazëror” dhe ka theksuar frymën e bashkëpunimit dhe vizionin e përbashkët për të ardhmen.
“Abu Dabi, Takimi sot me mikun e shtrenjtë, Presidentin Sheikh Mohammed Bin Zayed, ishte vëllazëror dhe me bindjen e fortë se për paqedashësit e ndërtuesit vullnetmirë të së ardhmes, më e mira është e gjitha përpara”, shkroi Rama krahas videos së publikuar në rrjetet sociale.
Kryeministri nënvizoi se diskutimet u zhvilluan me bindjen e fortë se për “paqedashësit dhe ndërtuesit vullnetmirë të së ardhmes, më e mira është përpara”, duke e cilësuar Presidentin e Emirateve si një mik të shtrenjtë dhe partner të besueshëm.
Qëllimi i kësaj vizite, siç theksoi një ditë më parë kreu i qeverisë, është shprehja e drejtpërdrejtë e solidaritetit vëllazëror me Emiratet e Bashkuara Arabe dhe Presidentin Sheikh Mohammed Bin Zayed.
Takimi vjen në kuadër të marrëdhënieve në rritje të vazhdueshme mes Shqipërisë dhe Emirateve, të cilat vitet e fundit kanë njohur bashkëpunim në fusha të ndryshme, përfshirë investimet dhe zhvillimin ekonomik. Kjo vizitë zhvillohet në një periudhë të trazuar për rajonin e Gjirit Arabik. Përmes mesazhit të tij në rrjetet sociale, Kryeministri theksoi mbështetjen për vendet mike, duke mbajtur një qëndrim të qartë ndaj zhvillimeve të fundit dhe duke riafirmuar angazhimin e Shqipërisë për paqe dhe bashkëpunim në rajon, transmeton rtsh.
