Autoritetet në Serbia kanë arrestuar katër shtetas të Shqipërisë nën dyshimin për “nxitje të urrejtjes” dhe “intolerancës kombëtare”, pas publikimit të një videoje në rrjete sociale gjatë udhëtimit të tyre në autostradë në territorin serb.
Sipas një njoftimi zyrtar nga Ministria e Punëve të Brendshme e Serbisë, personat e moshës nga 21 deri në 48 vjeç dyshohet se gjatë lëvizjes me automjet kanë shfaqur simbole të lidhura me Shqipërinë dhe kanë bërë deklarata që autoritetet i kanë cilësuar si të papërshtatshme ndaj shtetit serb.
Policia serbe ka identifikuar dhe arrestuar katër shtetas shqiptarë me inicialet A. S. (1989), E. V. (1984), E. G. (1978) dhe A. C. (2005), të cilët dyshohet se kanë kryer veprën penale të nxitjes së urrejtjes dhe intolerancës kombëtare, racore dhe fetare.
Në deklaratën zyrtare thuhet se njëri prej të dyshuarve ka publikuar një video në Facebook, ku shfaqet duke udhëtuar me një automjet tip Audi nëpër një autostradë në Serbi, së bashku me personat e tjerë. Në video, sipas autoriteteve, shfaqen simbole të ashtuquajtura të “Shqipërisë së Madhe”, si dhe dëgjohen komente verbale që përmendin Serbinë në një kontekst negativ.
Autoritetet theksojnë se publikimi është bërë në një datë që përkon me përvjetorin e fillimit të bombardimeve të NATO ndaj Serbisë, një moment historik i ndjeshëm për opinionin publik në vend.
Të dyshuarit janë ndaluar për 48 orë, ndërsa ndaj tyre pritet të ndërmerren procedura të mëtejshme ligjore në përputhje me ligjet në fuqi në Serbi.
Deri më tani, nuk ka pasur reagime zyrtare nga autoritetet në Shqipëri lidhur me këtë rast, ndërsa pritet që zhvillimet e mëtejshme të sqarojnë rrethanat dhe pasojat ligjore për të arrestuarit, transmeton rtk.
