Protesta e iniciativës “Jo në emrin tim” ka përfunduar sonte pas ditës së 18-të, ndërsa protestuesit kanë marshuar drejt njërës prej hyrjeve të Kuvendit të Kosovës, duke kërkuar nga deputetët që të votojnë pa vonesë ndryshimet dhe plotësimet në Ligjin për Dhomat e Specializuara.
Pas përfundimit të protestës, protestuesit janë zhvendosur drejt Kuvendit, ku zhvilluan një aksion simbolik. Ata lexuan një nga një emrat e 110 deputetëve të Kuvendit të Kosovës, duke u bërë thirrje që të marrin përgjegjësinë dhe të votojnë projektligjin.
Organizatori i protestave të përnatshme “Jo në emrin tim”, Çlirim Haziri, tha para protestuesve se Kuvendi, sipas tij, ka një përgjegjësi ndaj UÇK-së dhe dëshmorëve të saj.
“UÇK-ja e ndërtoi këtë shtet, sakrifica e saj, plagët e saj dhe gjaku i dëshmorëve të saj. Ky Kuvend ia ka borxh ligjin”, deklaroi Haziri.
Ai theksoi se kërkesa e protestuesve nuk lidhet, sipas tij, me frikën nga drejtësia, por me mënyrën se si trajtohet çështja e UÇK-së dhe ish-pjesëtarëve të saj.
“Jo pse ne frikësohemi nga drejtësia, por nuk do ta lejojmë që një padrejtësi të shitet si drejtësi”, tha ai.
Thirrje deputetëve për votim
Protestuesit kërkuan që procesi i ndryshimeve ligjore të mos shtyhet më tej. Ata u bënë thirrje deputetëve të Kuvendit që të veprojnë dhe të marrin një qëndrim për projektligjin.
Aksioni u zhvillua në një periudhë të ngarkuar politike në Kosovë, kur, sipas protestuesve, kanë mbetur edhe tri ditë deri në përfundimin e afatit kushtetues për zgjedhjen e Presidentit të Kosovës.
Protesta “Jo në emrin tim” tashmë ka hyrë në ditën e 18-të. Përgjatë këtyre ditëve, organizatorët kanë kërkuar veprime konkrete nga institucionet për çështjet që lidhen me UÇK-në dhe ish-pjesëtarët e saj. Në përfundim të protestës së mbrëmjes, marshimi drejt Kuvendit u shoqërua me thirrje për votimin e ndryshimeve në Ligjin për Dhomat e Specializuara, ndërsa leximi i emrave të deputetëve u përdor nga protestuesit si një formë e drejtpërdrejtë e adresimit të kërkesës së tyre ndaj Kuvendit. Protestuesit paralajmëruan vazhdimin e presionit publik për këtë çështje, duke kërkuar që institucionet të marrin vendim pa vonesa të mëtejshme./BS
