Kapiteni i Përfaqësueses së Kosovës, Amir Rrahmani, nuk do të jetë në dispozicion për ndeshjen e radhës ndaj Sllovakisë, pas një lëndimi serioz të pësuar në fundjavë gjatë përballjes mes SSC Napoli dhe AS Roma.
Sipas raportimeve nga mediat italiane, mbrojtësi kosovar do të mungojë për disa muaj, duke i dhënë një goditje të rëndë si klubit të tij ashtu edhe Kombëtares së Kosovës. Klubi napolitan ka konfirmuar se Rrahmani ka kryer testet mjekësore në spitalin “Pineta Grande”, ku është konstatuar një lezion i gradës së lartë në biceps femoris të kofshës së majtë.
Ky dëmtim i shkallës së lartë kërkon kohë të gjatë rikuperimi, duke e lënë kapitenin jashtë fushave për një periudhë të konsiderueshme. Mungesa e tij pritet të ndikojë ndjeshëm në repartin defensiv të Kosovës, veçanërisht në ndeshjen e rëndësishme ndaj Sllovakisë.
Stafi mjekësor i Napolit tashmë ka nisur programin e rehabilitimit për Rrahmanin, ndërsa rikthimi i tij do të varet nga ecuria e rikuperimit në javët dhe muajt në vijim./BS
