Nga Hamzë Morina
Në ambientet e Klubit “Dardania” në Zofingen u shënua 16-vjetori i veprimtarisë së suksesshme të Shoqatës Humanitare Kulturore “Sali Çekaj”. Ky përvjetor mblodhi kryesinë e shoqatës, veprimtarë të dalluar dhe anëtarë të komunitetit, të cilët u bashkuan për të reflektuar mbi rrugëtimin, arritjet dhe kontributin e kësaj shoqate ndër vite.
Me këtë rast, kryetari i shoqatës, z. Saim Tahiraj, përshëndeti të pranishmit duke i falënderuar për përkushtimin, angazhimin dhe mbështetjen e vazhdueshme, që kanë qenë shtylla kryesore e suksesit të shoqatës në fushën humanitare dhe kulturore. Ai theksoi rëndësinë e bashkëpunimit dhe solidaritetit në ruajtjen e vlerave kombëtare dhe në ndihmën ndaj atyre që kanë nevojë.
Ndërkohë, arkatari i shoqatës, z. Muhamet Krasniqi, prezantoi një pasqyrë të detajuar financiare, duke dokumentuar me shifra dhe fakte konkrete të gjitha aktivitetet, projektet dhe rezultatet e arritura gjatë këtyre 16 viteve punë të pandërprerë.
Mbrëmja festive u përmbyll në një atmosferë të ngrohtë dhe festive, e cila u pasurua nga interpretimet e këngëtarit të njohur Valon Islamaj, i cili argëtoi të pranishmit dhe i dha ngjarjes një dimension të veçantë artistik.
Ky përvjetor dëshmoi edhe një herë rolin e rëndësishëm të Shoqatës “Sali Çekaj” në jetën shoqërore, humanitare dhe kulturore të mërgatës shqiptare në Zvicër, transmeton helveticALforum.ch
