Humbja në “Clasico” ndaj Standard Liège rezultoi fatale për Besnik Hasin. Klubi i Anderlechtit njoftoi të dielën në mbrëmje se ka ndërprerë bashkëpunimin me trajnerin shqiptar, ndërsa ndihmësi i tij, Edward Still, do të marrë përkohësisht drejtimin e skuadrës së parë.
RSC Anderlecht konfirmoi vendimin vetëm disa orë pas humbjes 2:0 ndaj rivalit të përjetshëm Standard Liège.
“Klubi dëshiron ta falënderojë Besnik Hasin për angazhimin dhe përkushtimin e tij.
Edward Still do të drejtojë përkohësisht ekipin e parë deri në emërimin e trajnerit të ri”, thuhet në njoftimin e klubit, i cili aktualisht renditet në vendin e katërt në Jupiler Pro League.
Besnik Hasi (54 vjeç) ishte rikthyer në stolin e Anderlechtit në mars të vitit 2024, pas shkarkimit të David Hubert, duke nisur kështu mandatin e tij të dytë pas periudhës 2014–2016. Sezonin e kaluar, ai e udhëhoqi Anderlechtin drejt vendit të katërt në kampionat dhe arriti finalen e Kupës së Belgjikës, të cilën e humbi ndaj Club Brugge.
I konfirmuar në detyrë verën e kaluar, Hasi u shkarkua pas një serie rezultatesh negative, ku skuadra grumbulloi vetëm 5 pikë nga 21 të mundshme. Këtë sezon, ai regjistroi 15 fitore, 8 barazime dhe 9 humbje në 32 ndeshje në të gjitha garat.
Megjithatë, Anderlecht mbetet në vendin e katërt me 36 pikë, por ndjen presionin e Gentit, Charleroit dhe Mechelenit (të tre me nga 33 pikë). Në krye të renditjes, Union Saint-Gilloise kryeson me diferencë të madhe, ndërsa Club Brugge dhe Sint-Truiden janë përkatësisht 8 dhe 9 pikë para.
Anderlechti vazhdon garën në Kupë, ku të enjten (20:30) pret Antwerp-in në ndeshjen e parë gjysmëfinale.
“Si lojtar dhe trajner, Hasi ka një lidhje të fortë me Anderlechtin. Ai e nisi karrierën e trajnerit në vitin 2014, pas pesë vitesh si ndihmës i Ariel Jacobs dhe John van den Brom, duke fituar titullin kampion po atë vit.
Pas largimit në 2016, ai drejtoi Legia Varshavën, Olympiacos, Al-Raed, Al-Ahli dhe Mechelen”, shkruan media belge “Le Soir”./K.G/BS
