Interesi dhe besimi i të rinjve ndaj uniformës dhe shërbimit ndaj Atdheut po shënojnë rritje të qëndrueshme, sipas të dhënave më të fundit nga proceset e rekrutimit. Statistikat tregojnë një prirje pozitive në marrëdhënien mes rinisë dhe Forcat e Armatosura të Republikës së Shqipërisë, duke reflektuar një rikthim të vëmendjes ndaj karrierës ushtarake.
Sipas burimeve zyrtare, rritja e pagave, konsolidimi i shërbimit ushtarak si një profesion i denjë dhe afatgjatë, si edhe forcimi i dinjitetit të uniformës, kanë ndikuar drejtpërdrejt në motivimin e të rinjve për t’u bërë pjesë e shërbimit aktiv. Këto masa kanë përforcuar perceptimin e ushtrisë si një institucion me perspektivë dhe stabilitet profesional.
Rezultatet e këtyre politikave reflektohen edhe në shifra konkrete. Vetëm gjatë Fazës I të vitit 2026 janë regjistruar 343 aplikime, duke konfirmuar vijimësinë e trendit rritës të vitit 2025 dhe interesin në rritje për rekrutimin në Forcat e Armatosura.
Ndërkohë, institucionet e mbrojtjes po fokusohen jo vetëm në shtimin numerik të efektivëve, por edhe në rritjen e cilësisë së komponentit aktiv, përmes investimeve në përgatitjen profesionale, mirëqenien dhe perspektivën afatgjatë të personelit. Ky zhvillim vlerësohet si një tregues i rëndësishëm i ringjalljes së lidhjes mes të rinjve dhe ushtrisë, si edhe i forcimit të rolit të saj në garantimin e sigurisë kombëtare, transmeton gtema.
