Në përfundim të protestës së kësaj të hëne, kryetari i Partisë Demokratike, Sali Berisha, pas një parakalimi në bulevard, u ndal në selinë e PD-së, ku shprehu mirënjohjen ndaj të gjithë qytetarëve që iu përgjigjën thirrjes për protestë.
Berisha e cilësoi tubimin si një “protestë historike”, duke theksuar se aksioni i nisur nga opozita nuk do të ndalet deri në largimin e kryeministrit Edi Rama, të cilin e quajti “armik” të vendit dhe të pluralizmit politik.
“Kjo ishte një protestë historike. Duhet ta kuptojë secili prej nesh misionin tonë. Nëse para 11 majit u ngritëm për të shpëtuar Partinë Demokratike dhe pluralizmin politik, sot jemi në këmbë për të shpëtuar Shqipërinë dhe familjen shqiptare. Ky është misioni më i lartë dhe më sublim i jetës sonë”, deklaroi Berisha.
Kreu i PD-së e krahasoi këtë betejë politike me lëvizjet historike të vitit 1990, duke e cilësuar si edhe më vendimtare për të ardhmen e vendit.
“Ky është një mision që do të përcaktojë fatin e Shqipërisë, fatin e demokracisë dhe fatin e familjes shqiptare. Ndaj përulem para secilit prej jush që erdhët dhe betohemi ta vazhdojmë këtë betejë deri në fitore. Ne jemi të pamposhtur”, tha ai.
Berisha përsëriti akuzat e tij ndaj qeverisë, duke e quajtur mazhorancën aktuale “kufomë politike”, ndërsa paralajmëroi se protestat do të vijojnë dhe do të përqendrohen në disa institucione kyçe.
“Ky aksion nuk ndalet deri në largimin e Edi Ramës. Tre do të jenë drejtimet e protestës sonë: Kryeministria, Parlamenti dhe Surreli”, u shpreh Berisha.
Ai theksoi se opozita do të vazhdojë mobilizimin qytetar dhe se aksionet e saj do të shtrihen në çdo hap të betejës politike kundër qeverisë, transmeton euronewsal.
