Në një ditë tejet të veçantë për trevën e Kërçovës dhe mbarë shqiptarët, në fshatin piktoresk të Garanës u zhvillua ceremonia madhështore e përurimit të shtatores së kryeheroit tonë kombëtar, Gjergj Kastriotit – Skënderbeut. Në këtë ngjarje historike, e cila bashkoi zemrat dhe emocionet e shumë bashkatdhetarëve, mori pjesë edhe Shoqata “Gjergj Kastrioti” nga Zvicra, me ftesë të Shoqatës “Garana” dhe kryetarit të saj, Dr. Faik Elezi.
Pjesëmarrja e diasporës shqiptare nga Zvicra i dha ngjarjes një dimension edhe më të gjerë mbarëkombëtar, duke dëshmuar se lidhja me vendlindjen mbetet e fortë, e gjallë dhe e pandërprerë. Përfaqësuesit e Shoqatës “Gjergj Kastrioti” Zvicër shprehën nderin dhe kënaqësinë e tyre për këtë ftesë, e cila u bë pjesë e një momenti historik për rajonin dhe kulturën tonë kombëtare.
Krahinat e Kërçovës kanë arsye të veçantë për të qenë krenare. Kryeheroi ynë i pavdekshëm, Gjergj Kastrioti-Skënderbeu, sipas trashëgimisë historike, ka lidhje gjaku me këtë trevë, si pinjoll i Principatës së Gërgurve. Me këtë shtatore të re, kjo lidhje shekullore merr formë të prekshme dhe ngre edhe më lart nderimin ndaj figurës së tij titanike.
Ceremonia nuk ishte thjesht një përurim simbolik. Ajo ishte një mesazh i fuqishëm:
amaneti dhe fryma e Skënderbeut janë gjallë, të pranishme dhe të patjetërsueshme në çdo zemër shqiptare. Kjo vepër e përjetësuar në bronz dëshmon se atdhedashuria, uniteti dhe përkushtimi janë forca që ndërtojnë vepra të pavdekshme.
Shoqata “Gjergj Kastrioti” Zvicër shprehu mirënjohje të thellë ndaj Shoqatës “Garana” dhe Dr. Faik Elezit për vizionin, punën e palodhur dhe përkushtimin e tyre kombëtar, që me vullnet e dashuri po e pasurojnë mozaikun historik e kulturor të trojeve tona.
Kjo ditë mbetet një gur i çmuar kujtese për Garanën, për Kërçovën dhe për gjithë kombin shqiptar.
Rroftë Garana!
Rroftë Kërçova!
Rroftë Kombi Shqiptar!
Rroftë i përjetshmi Gjergj Kastrioti – Skënderbeu! Më respekt dhe dashuri për të pamposhturin Gjergj Kastrioti-Skënderbeu. Shoqata “Gjergj Kastrioti” Zvicër – në Kërçovë.
Agim Pepaj, kryetar i Shoqatës “Skënderbeu”, i shoqëruar nga miq të shoqatës, u shpreh për HelveticALForum se kjo ishte një ditë e veçantë, e paharrueshme, për të cilën kishin udhëtuar enkas nga Zvicra, duke theksuar se heronjtë tanë meritojnë t’i nderojmë edhe më shumë.
HelveticALforum.ch
