Winterthur, 29 Nëntor 2025 — Atmosfera festive po afrohet dhe zemrat shqiptare në Zvicër po rrahin njësoj: Dita e Flamurit dhe e Pavarësisë ka trokitur në zemrat tona, dhe Ansambli TROJET ka përgatitur një mbrëmje të jashtëzakonshme që nuk duhet humbur. Në Hotel Zentrum Töss do të zhvillohet një nga aktivitetet më të mëdha kulturore të vitit, ku arti, muzika dhe tradita do të ndërthuren në një festim të denjë për 28 Nëntorin.
Hyrja është falas, ndaj thirrja është e qartë:
Mos e humbni këtë natë që premton emocion, kulturë dhe krenari kombëtare.
Një mbrëmje me dy ngjarje të mëdha
Më 29 Nëntor, dyert hapen në ora 18:30, ndërsa në 18:45 do të inaugurohet ekspozita personale e artistes së mirënjohur Valbona Gashi, me titullin “Gjurmët në Medalion” – një udhëtim artistik që prek rrënjët, kujtesën dhe identitetin tonë shpirtëror.
Në 19:30 nis programi i pasur artistik i Ansamblit TROJET, i cili këtë vit sjell një skenë të larmishme me zëra të fuqishëm dhe tradita të përjetshme.
Artistë të shquar në skenë
Mbrëmjen do ta madhështojnë shumë emra të dashur për publikun:
- Kori i grave “Lyra” nga Cyrihu – një performancë unike që prek shpirtin
- Motrat Luljeta dhe Drita Fetahu
- Vëllezërit Arbnor dhe Rrezart Kuqi
- Marisa Murtezi
- Melisa Tafili
- Eliza Zeqiri
Dhe padyshim, një nga momentet më të pritura të natës:
Lahutisti ynë i respektuar, Baca Shaqë, me këngët kreshnike që i japin zë maleve tona dhe historisë sonë. Lahuta e tij tingëllon si një thirrje që na bashkon me origjinën, me fuqinë dhe qëndrueshmërinë e popullit tonë.
Organizim i përkryer
Mbrëmja do të moderohet nga Sherife Zeqiri, ndërsa pjesa teknike, tingulli dhe muzika garantohet nga profesionisti Liridon Pervorfi.
Thirrja për bashkim
Në një kohë kur shqiptarët kudo në botë kërkojnë rrugë për t’u bashkuar me kulturën, traditat dhe identitetin, kjo natë në Winterthur është shumë më tepër se një koncert:
Është një përqafim i përbashkët i historisë, krenarisë dhe bashkësisë sonë.
Ansambli “TROJET” ftonë të gjithë bashkatdhetarët:
Ejani ta festojmë 28 Nëntorin së bashku — me zemër, me flamur, me këngë dhe me art që na përbashkon, transmeton helveticALforum.ch
Mirë se vini!
Sponsor medial HelveticALforum.ch
