Nga: Dashnim HEBIBI
Winterthur, Zvicër – Tetor 2025 – Presidenti i Shoqatës Kulturore Artistike “Dardania”, z. Shefqet Cakolli, ka njoftuar se edhe këtë vit, shoqëria me qendër në Winterthur të Zvicrës është duke punuar me përkushtim për të organizuar festimet madhështore të 28 Nëntorit – një datë historike për kombin shqiptar. 
Sivjet, SH.K.A “Dardania” do të organizojë një ngjarje të veçantë, ku do të kremtohen tri festa në një ditë:
- Festa e Alfabetit dhe Kongresi i Manastirit,
- Festa e Flamurit dhe Pavarësisë së Shqipërisë, dhe
- 31-vjetori i themelimit të SH.K.A “Dardania”.
“Ftesa është e hapur për të gjithë dashamirët e kulturës dhe artit shqiptar. Do të kemi një program të pasur, me shumë risi, dhe një atmosferë që e meriton festa jonë kombëtare. Ju ftojmë të rezervoni datën dhe të festojmë së bashku vetëm shqip!”, – ka theksuar z. Cakolli në një deklaratë për sam24.info NJË PROGRAM I PASUR DHE EMOCIONUES Festimet do të përfshijnë:
- Performanca të ansamblit “Dardania” dhe mysafirëve nga diaspora dhe trojet shqiptare,
- Muzikë tradicionale dhe moderne shqiptare,
- Valle, poezi dhe recitime kushtuar historisë kombëtare,
- Ceremoni nderimi për figurat dhe kontribuesit e shquar të kulturës shqiptare në diasporë.
- FTESË PËR SPONSORË DHE DONATORË
Organizatorët ftojnë të gjithë sponsorët e interesuar, individët dhe bizneset shqiptare në Zvicër dhe më gjerë, që të mbështesin këtë ngjarje të rëndësishme kulturore. “Me ndihmën dhe bashkëpunimin tuaj, ne synojmë të sjellim një festë dinjitoze, që i shërben ruajtjes dhe promovimit të trashëgimisë sonë kombëtare.” Për më shumë informata dhe bashkëpunim, kontaktoni SH.K.A “Dardania” në rrjetet sociale apo përmes përfaqësuesve të saj në komunitet.
U MIRËPRESIM ME KËNAQËSI – SEPSE NE FESTOJMË VETËM SHQIP!