Nga Dashnim HEBIBI
Prof. Dr. Ylber Qusaj këto ditë po qëndron në atdhe, aty ku gjithmonë është pritur me respekt dhe dashuri. Për të, pak rëndësi ka nëse ndodhet në Shqipëri, Kosovë apo Maqedoninë e Veriut – ai ndihet njësoj, mes njerëzve të tij dhe profesionistëve me të cilët ndan misionin e përbashkët të shëndetësisë.
Një prej aktiviteteve më të veçanta të kësaj vizite ishte pjesëmarrja e tij në Konferencën e II-të Farmaceutike, e cila u mbajt në Tetovë. Me një prani dinjitoze dhe kontribut të çmuar, Prof. Dr. Qusaj prezantoi dy punime me rëndësi të veçantë:
- “Siguria e barnave dhe menaxhimi i efekteve anësore”
- “Legjislacioni farmaceutik në Bashkimin Evropian dhe ndikimi i tij tek farmacistët, sidomos në rajonin tonë të Ballkanit”
Në fjalën e tij, ai theksoi se siguria e barnave është një ndër shtyllat themelore të farmacisë moderne, ndërsa legjislacioni i BE-së mbetet një udhëzues i domosdoshëm për zhvillimin e standardeve dhe për harmonizimin e praktikave profesionale edhe në vendet e Ballkanit.
“Ishte një mundësi e shkëlqyer për të takuar shumë kolegë e profesionistë të shëndetësisë nga rajoni, për të shkëmbyer ide dhe për të ndarë përvoja mbi sfidat dhe perspektivat e farmacisë moderne,” – u shpreh Prof. Dr. Qusaj.
Në fund, ai shprehu mirënjohjen e tij të veçantë për organizatorët dhe për të gjithë pjesëmarrësit, të cilët e bënë këtë konferencë një ngjarje të vlefshme dhe frymëzuese për farmacistët dhe profesionistët e shëndetit në të gjithë rajonin.