Kush zgjat shumë studimet, do të paguajë dyfishin e tarifës semestrale në Universitetin e Bazelit
Studentët që nuk përfundojnë studimet e tyre bachelor brenda pesë viteve në Universitetin e Bazelit, mund të përballen me një sanksion financiar: tarifë semestrale të dyfishuar. Megjithatë, kjo masë mund të shmanget nëse studentët lidhin një marrëveshje me universitetin dhe e respektojnë atë.
Sipas një njoftimi për media të publikuar të hënën nga universiteti, ata që nuk lidhin një marrëveshje, nga semestri i 13-të do të detyrohen të paguajnë 1700 franga për semestër, në vend të tarifës aktuale prej 850 frangash.
Universiteti do t’i ftojë studentët bachelor që janë të regjistruar për më shumë se pesë vite në një takim personal këshillues. Qëllimi i këtij takimi është hartimi i një plani të qartë dhe të përshtatur për përfundimin e studimeve, që do të përmblidhet me shkrim. Dyfishimi i tarifës aplikohet vetëm nëse studenti nuk e përfundon studimin brenda afatit të dakorduar.
Kjo masë do të hyjë në fuqi nga semestri pranveror i vitit 2026 dhe do të zbatohet me një periudhë tranzitore prej dy vitesh. Kjo do të thotë se aplikimi i parë i tarifës së dyfishuar do të ndodhë më së herëti në semestrin pranveror të vitit 2028.
Zakonisht, për përfundimin e një studimi bachelor nevojiten së paku tre vite. Megjithatë, për arsye të ndryshme si puna krahas studimeve, detyrimet familjare, përsëritja e provimeve apo ndryshimi i drejtimit të studimit, shpeshherë studentët zgjasin më shumë kohë për përfundimin e tyre. Universiteti thekson se dëshiron të ruajë këtë fleksibilitet, por njëkohësisht të sigurohet që studimet të mos zvarriten pa nevojë.
Universiteti i Bazelit po ndjek shembullin e universiteteve të tjera zvicerane që tashmë zbatojnë politika të ngjashme. Në Universitetin e Bernës, për shembull, tarifa standarde është 750 franga për semestër, por rritet në 1500 franga nga semestri i 13-të nëse studenti nuk ka diplomuar. Në raste të veçanta, rritja mund të zbritet pjesërisht ose të mos aplikohet fare, sipas faqes zyrtare të Universitetit të Bernës, transmeton 20min.ch
SAM24.info
