Nga: Dashnim HEBIBI, Aarburg
Më 15 qershor 2025, në adresën Oltnerstrasse 14, 4663 Aarburg, u mbajt Kuvendi i III-të Zgjedhor i LSHPMBZ, i cili filloi punën në ora 12:00. Ky kuvend përbënte një moment të rëndësishëm për të bashkëbiseduar dhe për të forcuar më tej unitetin mes shoqatave të Luginës së Preshevës në Zvicër.
Në këtë ngjarje morën pjesë përfaqësues nga 16 shoqata të ndryshme nga Lugina, të cilët ndanë mendimet dhe vizionet e tyre për një të ardhme më të sigurt dhe të bashkuar për komunitetin tonë. Kuvendi u zhvillua nën moton:
“Ne jemi të bashkuar – le ta forcojmë edhe më shumë këtë unitet!”
Takimi u mbështet fuqishëm edhe nga tre ambasadat shqiptare në Zvicër:
- Ambasada e Republikës së Shqipërisë
- Ambasada e Republikës së Kosovës
- Ambasada e Republikës së Maqedonisë së Veriut
Kuvendi u drejtua me përkushtim nga z. Fadil Selmani, një personalitet i njohur nga Topalla e Medvegjës, dhe kryetar i parë i këtij këshilli. Ai ishte i shoqëruar nga z. Zejnullah Namani nga Medvegja, i cili jeton në Zvicër dhe njëkohësisht është edhe kryetar i Shoqatës “Medvegja” në Zvicër.
Mbi 20 pjesëmarrës nga e gjithë Lugina ishin prezent, të cilët falënderuan ambasadorin e Kosovës z. Mentor Latifi dhe ambasadorin e Maqedonisë së Veriut z. Rexhep Demiri për përkrahjen e tyre të vazhdueshme.
Nga Shoqata “Lugina e Preshevës” ishte i pranishëm edhe z. Fazli Musliu, kryetar nderi, dhe z. Shefket Hasani, ish-komandant i UÇPMB-së, i njohur si i pari që krisi pushkën për ribashkimin me Kosovën. Ky kuvend shënoi një risi të rëndësishme – konfirmimin se Shoqata “Lugina e Preshevës” është në mbështetje të unitetit, duke u përqendruar te veprat konkrete e jo te trumbetimet, me qëllimin e vetëm për të lënë gjurmë të mira për të ardhmen.
Z. Valon Gashi, Sekretar i Parë i Ambasadës së Shqipërisë në Bernë, nuk ishte i pranishëm për arsye pune, por dihet si një nismëtar dhe përkrahës i fuqishëm i bashkimit dhe veprimit të përbashkët të asaj treve.
Z. Fadil Selmani, me përvojë të gjatë si sekretar në Shoqatën “Medvegja”, e drejtoi punën e kuvendit në mënyrën më të mirë të mundshme. Ai u ngrit në këmbë për të falënderuar përzemërsisht ambasadorët Latifi, Demiri dhe z. Valon Gashi selretar i parë i ambasadës së Maqedonisë së Veriut në Bernë, për përkrahjen e tyre të sinqertë, dhe më pas u dha fjalën ambasadorëve.
Ambasadori Mentor Latifi theksoi se Ambasada e Kosovës do të ketë gjithmonë dyert e hapura dhe do të jetë përherë në mbështetje të unitetit dhe bashkëpunimit. Ai siguroi të pranishmit se Lugina e Preshevës nuk do të harrohet kurrë nga Kosova.
Ndërsa ambasadori Rexhep Demiri shprehu kënaqësinë e tij për zhvillimin e këtij kuvendi, duke theksuar se aty ku ka bashkim, ka edhe sukses. Ai u bëri thirrje të gjithëve që të ruajnë gjuhën, traditat kombëtare dhe të kultivojnë miqësinë me shtetin pritës, Zvicrën.
Z. Shefket Hasani në fjalën e tij të shkurtër tha:
“Kur ka qenë nevoja, isha i pari; edhe tani, pas atij që zgjidhet i pari, do të jem prapa tij. Deri në frymën e fundit nuk do të ndalem për të mirën e kombit.”
Ndërsa z. Fazli Musliu propozoi riaktivizimin e Akademisë së UÇPMB-së, me qëllim që të mos harrohet kurrë gjaku i dëshmorëve. Ky propozim u përkrah nga z. Hasani, i cili e quajti kujtimin e dëshmorëve detyrim të përhershëm.
Kuvendi zgjati 20 minuta dhe u menaxhua me efikasitet, pa asnjë pengesë. U zgjodhën 6 anëtarë të kryesisë së re, të cilët në ditët në vijim do të zgjedhin kryetarin. Këtë herë, kryetari do të vijë nga Bujanoci, dhe u përfol emri i z. Tefik Selmani, i cili nuk mundi të jetë i pranishëm për shkak të një rasti familjar.
Anëtarët e rinj të kryesisë janë:
- Tefik Selmani
- Besnik Avdiu
- Zejnullah Namani
- Fadil Selmani
- Adnan Imeri
- Ardian Asllani
Në fund të takimit, u vendos që të vizitohet varri i PhD. Llukman Halili në Cyrih, për ta nderuar me një minutë heshtje, me rastin e 5-vjetorit të ndarjes nga jeta më 13 qershor.
Të gjithë pjesëmarrësit falënderuan ambasadorët për përkrahjen dhe theksuan se Lugina e Preshevës nuk është ndjerë kurrë më e përkrahur. Kuvendi u mbyll me shpresën dhe besimin se kryesia e re do të sjellë projekte konkrete dhe do të punojë për të mirën e komunitetit, me përfaqësim dinjitoz nga zona e Bujanocit.
Për më shumë informata, kontaktoni Këshillin Organizativ të LSHPMBZ