/ Nga: Dashnim HEBIBI /
Në mbledhjen e Shoqatës Kulturore Shqiptare në Fricktal (ShKShF), të mbajtur më 6 prill 2025, u zhvilluan zgjedhjet për Kryesinë e re të Shoqatës për periudhën 2025-2026. Pas një diskutimi të frytshëm mbi buxhetin dhe aktivitetet e deritanishme, anëtarët e Shoqatës votuan dhe konstituuan Kryesinë e re, e cila do të drejtojë shoqatën për vitet e ardhshme. Kryetar i ri u zgjodh Prof.dr. Ylber Qusaj, i cili në fjalën e tij të parë, falënderoi të gjithë anëtarët për besimin dhe angazhimin e tyre.
Kryesia e re e ShKShF është si më poshtë:
- Kryetar: Dr. Ylber Qusaj
- Zëvendëskryetar: Rafet Ademi
- Sekretar: Gafurr Ahmeti
- Zëvendëssekretar: Nderim Ibrahimi
- Arkëtar: Faton Ramadani
- Zëvendësarkëtar: Ilmi Ramadani
- Revizor: Arsim Rustemi
Në një prononcim ekskluzive për Qendrën Mediale Shqiptare SAM24.info, Dr. Qusaj shprehu entuziazmin e tij për këtë detyrë të re dhe theksoi angazhimin e tij për të punuar në ndershmëri dhe transparencë, me synim krijimin e mundësive për gjeneratën e re.
“Kam pranuar këtë detyrë me dëshirën më të madhe dhe do të angazhohem që të punojmë së bashku për të forcuar lidhjet mes komunitetit shqiptar në Zvicër dhe shtetit zviceran,” tha Dr. Qusaj.
Ai theksoi se një nga prioritetet kryesore do të jetë integrimi i suksesshëm i shqiptarëve në shoqërinë zvicerane, duke përdorur kulturën si një mjet të fuqishëm për ndërtimin e urave të bashkëpunimit.
Po ashtu, ai foli për rëndësinë e përfshirjes aktive të të rinjve në aktivitetet e Shoqatës. “Përmes projekteve kulturore, edukative dhe shoqërore, ne do të përgatisim gjeneratën e ardhshme për hapa të sigurt dhe do të krijojmë mundësi që të rinjtë shqiptarë të jenë pjesë e shoqërisë zvicerane dhe të kontribuojnë në forcimin e lidhjeve mes dy kulturave,” shtoi ai.
Një ndër aktivitetet e para të Kryesisë së re do të jetë “Guidë për Hiking dhe Grill” më 20 prill 2025, në Stein AG, një mundësi e shkëlqyer për anëtarët dhe simpatizuesit e Shoqatës për të kaluar kohë së bashku dhe për të forcuar lidhjet shoqërore.
Kryetari i deritanishëm, z. Rafet Ademi, falënderoi anëtarët për mbështetjen e dhënë gjatë mandatit të tij dhe theksoi se ai do të vazhdojë të kontribuojë si zëvendëskryetar, duke mbajtur angazhimin e tij për ruajtjen dhe promovimin e kulturës shqiptare.
Shoqata Kulturore Shqiptare në Fricktal, nën udhëheqjen e Kryesisë së re, do të vazhdojë të jetë një urë lidhëse e fuqishme për shqiptarët në Zvicër dhe një model për bashkëpunim dhe integrim të suksesshëm. Nuk mundemi asnashkaluar kontributin e madh të veprimtarit të njohur, z.Nderim Ibrahimi i cili e ka ngritur shoqatën falë miqësisë së madhe me zviceranë dhe atdhetarë të të gjitha trevave shqiptare.
Familja Ibrahimi ështe e njohur jo vetëm në Kosovë, por edhe në Zvicër e gjithandej për kontibut dhënie për kombitn. Dr. Qusaj dhe Kryesia e re janë të vendosur të sjellin energji të re dhe të rrisin aktivitetet kulturore dhe edukative, duke i dhënë mundësi të rinjve që të ruajnë lidhjet me kulturën e tyre dhe të ndërtojnë një të ardhme të suksesshme në Zvicër.
SAM24.info