Në ambientet elegante të Hotel Antunović në Zagreb, u zhvillua mbrëmë një manifestim madhështor me rastin e Ditëve të Rinisë Shqiptare, i cili mblodhi një numër të madh pjesëmarrësish nga komuniteti shqiptar në Kroaci dhe nga vende të tjera të rajonit. Ngjarja u shndërrua në një festë të vërtetë të rinisë, kulturës dhe identitetit shqiptar, e karakterizuar nga një atmosferë e ngrohtë, energji pozitive dhe krenari kombëtare.
Manifestimi u organizua nga Unioni Shqiptar, në bashkëpunim me Këshillin e Pakicës Kombëtare Shqiptare të Qytetit të Zagrebit dhe Klubin e të Rinjve Shqiptarë në Kroaci, duke dëshmuar edhe një herë përkushtimin e tyre të vazhdueshëm në ruajtjen e gjuhës, kulturës dhe traditave shqiptare në diasporë, si dhe në forcimin e lidhjeve ndërbreznore.
Programi artistik i mbrëmjes ishte i pasur dhe tejet atraktiv. Performanca e këngëtares së mirënjohur Gjyste Vulaj u prit me duartrokitje të pandërprera, ndërsa interpretimet e saj emocionuese krijuan momente të veçanta për publikun e pranishëm. Atmosfera festive u plotësua nga Vali Band, e cila me muzikë ritmike dhe repertor të zgjedhur, e shndërroi mbrëmjen në një festë të paharrueshme plot gjallëri dhe argëtim.
Pjesëmarrja e gjerë e të rinjve, familjeve, si dhe përfaqësuesve të institucioneve shqiptare dhe vendore, e bëri këtë manifestim një ngjarje të veçantë me rëndësi të madhe shoqërore dhe kulturore. Ajo u shndërrua në një simbol të bashkimit, solidaritetit dhe fuqisë së komunitetit shqiptar në Zagreb.
Ky manifestim nuk ishte vetëm një festë argëtuese, por edhe një mesazh i fuqishëm për rëndësinë e ruajtjes së identitetit kombëtar dhe promovimit të vlerave shqiptare në shoqërinë multikulturore kroate, duke dëshmuar se rinia shqiptare mbetet një urë e fortë lidhëse mes traditës dhe së ardhmes, njofton Unioni Shqiptar, transmeton helveticALforum.ch.
