/ Nga: Dashnim HEBIBI, Zürich /
Si pjesë e mërgatës që e ndjek me shumë kujdes çdo zhvillim në Kosovë, nuk mund të rri i heshtur përballë kësaj situate të rëndë politike që po zgjatet pa fund. Janë bërë 73 ditë nga zgjedhjet parlamentare dhe ende nuk kemi një qeveri. Përsëri po ndodh ajo që shpesh e kemi parë në të kaluarën: Kuvendi nuk po arrin të konstituohet për të pestën herë me radhë dhe puna e shtetit po bllokohet.
Sot, më 23 prill 2025, dështoi përsëri seanca për zgjedhjen e kryetarit të Kuvendit. Nuk po zgjat një takim më shumë se dhjetë minuta dhe popullata duke pritur ditë më të mira. Kishin ardhur 117 deputetë, por votimi nuk e kaloi shumicën e nevojshme: 57 pro, 46 kundër, 3 abstenuan. Kandidatja Albulena Haxhiu nuk mori votat e mjaftueshme, dhe seanca u shty për të premten. Të gjithë flasin, por askush nuk merr përgjegjësi.
Opozita jep një version, pozita një tjetër. Në vend të zgjidhjeve, po dëgjojmë akuza e deklarata politike që largojnë vëmendjen nga ajo që është më e rëndësishme – formimi i institucioneve. Deklarata si ajo e Abdixhikut që thotë se me 48 deputetë do ta kishte edhe kryetarin e Kuvendit, apo Memli Krasniqi që akuzon VV-në për bllokadë, tregojnë vetëm një gjë: luftë për karrige.
E për më keq, sjellja e kryeministrit në detyrë, Albin Kurti, kur kalon para gazetarëve pa i përshëndetur apo pa dhënë ndonjë prononcim, lë shije të hidhur. Respekti ndaj gazetarëve është respekt ndaj qytetarëve që duan të dinë se çfarë po ndodh me vendin e tyre. Këtë ma shprehu edhe një bashkatdhetar nga Peja që jeton në Zvicër, dhe jam i sigurt se shumë të tjerë ndihen njësoj.
Ne nga mërgata nuk kërkojmë asgjë më shumë veçse stabilitet, institucione funksionale dhe respekt ndaj demokracisë. Kemi dhënë shumë për Kosovën, dhe është e dhimbshme të shohim se si bllokohen proceset për interesa personale apo partiake. Nuk ka konsesus !
Është koha për reflektim. Kosova ka nevojë për lidership që i del zot shtetit, jo për skena të padenja ku gjithçka sillet rreth pushtetit. Le të shpresojmë se e premtja e datës 25 prill sjell një kthesë pozitive.
Ku është faji?
Kush do të mbaj përgjegjësi?
A do të kemi zgjedhje të reja?
Sa do të ketë humbje Kosova?
E shumë e shumë pyetje të tjera vijnë në çdo takim nga mërgimtarët tanë.
SAM24.info