/Nga: Dashnim HEBIBI, Zürich/
Interesi i mërgatës shqiptare për zhvillimet politike në Kosovë vijon të jetë i madh edhe sot, sidomos në prag të formimit të institucioneve të reja. Seanca konstituive e Kuvendit të Kosovës po përcillet me shumë vëmendje nga bashkatdhetarët tanë në diasporë, të cilët, si gjithmonë, mbeten me zemër në atdhe.
Edhe këtë herë gjatë zgjedhje parlamentare, vota e mërgatës u dha nga e gjithë Evropa dhe bota, si dëshmi e lidhjes së fortë shpirtërore dhe qytetare me Kosovën. Edhe pse shpesh shihet si e politizuar, mërgata, sidomos në vitet e fundit, është bërë më aktive dhe më e ndjeshme ndaj zhvillimeve politike në vend.
“Politikanët vijnë e shkojnë, por Kosova mbetet. Ajo është e qytetarëve të saj”, theksojnë shumë mërgimtarë të të gjitha moshave. Sipas tyre, pavarësisht jetës së ngarkuar dhe obligimeve të përditshme, veçanërisht gjenerata e parë dhe e dytë e ndjekin me përkushtim situatën politike në Kosovë. Gjenerata e tretë, megjithëse më pak e përfshirë aktualisht, pritet që në të ardhmen të luajë rol më aktiv në politikën e vendit ku jetojnë dhe, pse jo, edhe në Kosovë.
Ka shumë të rinj të arsimuar, profesionistë dhe intelektualë që dita-ditës po rriten në diasporë, të cilët mund të kontribuojnë me dije, përvojë dhe kulturë politike evropiane. Shumë veprimtarë të mërgatës shprehen se shpresojnë të vijë dita kur përfaqësues nga diaspora të kenë zë të drejtpërdrejtë në Kuvendin e Kosovës.
Mesazhi i përbashkët nga mërgata është i qartë: të kalojmë këtë fazë me maturi dhe unitet. Kosova ka nevojë për një qeveri të re sa më shpejt, sidomos në një kohë kur edhe situata globale kërkon stabilitet dhe vendimmarrje të shpejtë. Humbja e kohës dhe përçarjet janë luks që vendi nuk mund ta përballojë.
Populli është ai që vendos se kush duhet të udhëheqë qeverinë, por një gjë është e sigurt: bashkimi dhe përkushtimi janë çelësi për të ardhmen e vendit.