Komisioni Qendror i Zgjedhjeve (KQZ) ka reaguar pas shqetësimeve të ngritura lidhur me transportimin e materialeve zgjedhore, përfshirë edhe pakot me fletëvotime nga votimi jashtë Kosovës.
Në një njoftim KQZ ka bërë të ditur se tërheqja e dërgesave postare dhe dërgimi i materialeve zgjedhore në përfaqësitë diplomatike do të bëhet përmes rrugëve tokësore nga zyrtarët e saj, me ndihmën e Ministrisë së Punëve të Jashtme dhe Diasporës (MPJD).
KQZ thotë se MPJD ka siguruar automjetet transportuese, të cilat do të drejtohen nga zyrtarët e saj.
“Deri më tani, në disa raste, KQZ ka tërhequr pakot me fletëvotime, të cilat janë dërguar për të qëndruar përkohësisht në përfaqësi të ndryshme diplomatike, respektivisht në dhomat e tyre të sigurisë, ku vëzhgohen vazhdimisht nga kamerat. Këto tërheqje janë zhvilluar në një proces transparent, me njoftimin paraprak të vëzhguesve të subjekteve politike, të cilët nuk kanë evidentuar ndonjë vërejtje në protokollet e tërheqjes dhe në praninë e zyrtarëve të KQZ-së”, thuhet në njoftimin e KQZ-së.
Po ashtu, KQZ thekson se kthimi i materialeve zgjedhore në Kosovë do të bëhet nën shoqërimin e zyrtarëve të saj, duke ruajtur statusin e dërgesave diplomatike.
“Ky lloj i transportit ka karakterin diplomatik, me elementet shoqëruese, siç janë notat verbale, çka e shton sigurinë e ngarkesave”, vijon njoftimi i KQZ-së.
KQZ thotë se ky vendim është marrë për shkak se procedura tenderuese për shërbimet postare është ende në fazën e ankesave, duke pamundësuar nënshkrimin e kontratës me operatorin fitues. KQZ ka siguruar se, përveç këtij ndryshimi në transport, të gjitha procedurat e tjera për administrimin e dërgesave postare dhe materialeve zgjedhore do të zhvillohen sipas planifikimeve të miratuara më herët, njofton telegrafi.