TIRANË – Shqipëria shënon një moment të rëndësishëm në historinë e arsimit të lartë, pasi për herë të parë një universitet shqiptar përfshihet në renditjen prestigjioze botërore të universiteteve, të publikuar nga organizata ndërkombëtare Times Higher Education (THE) për vitin 2027.
Bëhet fjalë për Universitetin e Tiranës, i cili ka arritur të përfshihet në klasifikimin ndërkombëtar ku janë renditur 2.297 institucione të arsimit të lartë nga 118 vende të botës. Universiteti i Tiranës është pozicionuar në grupin 2001+, duke shënuar kështu praninë e parë të një institucioni universitar nga Shqipëria në këtë renditje globale.
Ky përfaqësim përbën një zhvillim me rëndësi për arsimin shqiptar, pasi e vendos një institucion akademik të vendit në të njëjtën hartë ndërkombëtare të vlerësimit me universitete nga vende të ndryshme të botës. Megjithatë, përtej simbolikës së këtij momenti, renditja tregon edhe sfidat që universitetet shqiptare kanë përpara në drejtim të cilësisë akademike, kërkimit shkencor dhe konkurrueshmërisë ndërkombëtare.
Në krye të klasifikimit vazhdojnë të qëndrojnë disa prej institucioneve më prestigjioze akademike në botë. Universiteti i Oksfordit mban vendin e parë, i ndjekur nga Instituti i Teknologjisë i Masaçusetsit (MIT), Universiteti i Princetonit dhe Universiteti i Stanfordit.
17 tregues përcaktojnë vlerësimin e universiteteve
Renditja e Times Higher Education nuk mbështetet vetëm në cilësinë e mësimdhënies, por në një sistem të gjerë vlerësimi që përfshin 17 tregues të performancës akademike.
Këta tregues përfshijnë pesë fusha kryesore: mësimdhënien, mjedisin kërkimor, cilësinë e kërkimit shkencor, perspektivën ndërkombëtare dhe bashkëpunimin me industrinë.
Për t’u përfshirë në këtë klasifikim, universitetet duhet të përmbushin kritere të caktuara akademike dhe kërkimore. Ndër kushtet kryesore është edhe kapaciteti për të realizuar të paktën 1.000 publikime shkencore gjatë një periudhe pesëvjeçare, sipas metodologjisë së përcaktuar nga organizata.
Universiteti i Tiranës e ka vlerësuar këtë arritje si një moment historik për institucionin dhe arsimin e lartë në Shqipëri, duke theksuar rëndësinë e bashkëpunimeve ndërkombëtare, projekteve kërkimore dhe përpjekjeve të vazhdueshme për forcimin e kapaciteteve akademike.
Një hap përpara, por edhe një sfidë për të ardhmen
Përfshirja në këtë renditje është një sinjal pozitiv për arsimin e lartë shqiptar, por njëkohësisht paraqet edhe një përgjegjësi të re për institucionet akademike të vendit.
Sfida e Universitetit të Tiranës në vitet e ardhshme do të jetë përmirësimi i pozitës në klasifikimin ndërkombëtar, rritja e numrit dhe cilësisë së publikimeve shkencore, zgjerimi i bashkëpunimeve me universitetet e huaja dhe krijimi i mundësive më të mëdha për studentët dhe studiuesit.
Ndërkohë, ky zhvillim duhet të shërbejë si nxitje edhe për universitetet e tjera shqiptare, publike dhe private, që të investojnë më shumë në kërkimin shkencor, inovacion dhe ndërkombëtarizim.
Shqipëria tashmë ka bërë hapin e parë drejt përfaqësimit në hartën botërore të universiteteve. Mbetet që ky sukses fillestar të shndërrohet në një proces të qëndrueshëm zhvillimi, në mënyrë që arsimi i lartë shqiptar të fitojë gjithnjë e më shumë vendin që meriton në hapësirën akademike ndërkombëtare, transmeton rtsh.
